Papa Roach puri kensep tasenba ‘Crooked Teeth’ taküm sayatsü

March 26, 2017 : Kentener telok Papa Roach-i parnok indang kensep 9 buba ‘Crooked Teeth’ taküm sayatsü asoshi renema lir aser taruba ita nungi tenzüka kenetenba sentongtem tesem balala nung ayonga akatsü asoshia renema lir. Parnoki iba kensep nungi ‘Crooked Teeth’ aser ‘help’ kenbo sayatokogo.
2015 küm ‘F.E.A.R.’ kensep sayaba sülen ‘Crooked Teeth’ ya iba den tatongtep kensep asütsü. Iba kensep ya North Hollywood nung mangaok aser Nicholas ‘RAS’ Furlong o Colin Brittain nati produce asütsü. Maneni ‘Crooked Teeth’ kensep nung aliba kentem parnok indang mezüng kentem atenba yimya nung mangaoka lir.
Iba hopta United States House of Representatives, Speaker Paul Ryan, ‘Care Act’ benokba nung tamakok anguba sülen Papa Roach pur ken ‘Last Resort’ pa gari nung tashi agi tema liasü ta olulu adokba sülen, parnok osang balala nung aiben adoka liasü. Aji saka iba osang ya shitak masü ta jangjaogo.
Taoba küm November ita sayaba ken ana; ‘Help’ aser ‘Crooked Teeth’ na kensep tasenba alitsü asoshi mekaa yulii download sütettsü. ‘Crooked Teeth’ ken ya parnoki mezüng atenba kentem kanga mesüka lir, maneni iba ken kecha masü, kensep tasenba nung ken ajunga ya 2000 küm sayaba parnok indang mezüng kensep ‘Infest’ nung tena aliba kentem atenba yimya nung tena lir.
Kensep tasenba nung ken; ‘Periscope’ aser ‘Sunrise Trailer Park’ nung Skylar Grey aser Machine Gun Kelly natia shilem agir.
Papa Roach pur Germany Matapaloz Festival, Texas nung River City Rockfest, Ohio nung Rock on the Range aser Florida Fort Rock kenten sentong nung shilem agitsü asoshi renema lir. April 11 aser April 14 Canada nung kentenba sentong nung parnok den yaritepa ‘Sum 41’ puri shilem agitsü.
‘Crooked Teeth’ kensep Eleven Seven Music ajanga 2017 May 19 nü sayatsü asoshi renema lir.