Paper ballots amshira langtsüngi alur ama asütsü: Krishnamurthy

Hyderabad, Metsüremi (March) 19 (Agencies): Electronic voting machines (EVMs) nung ashishiteptsü kecha mali aser paper ballots amshiba inyakyim tejen meyipa benshira ibaji langtsüngleni aluba ama asütsü, ta taoba Chief Election Commissioner (CEC) T.S. Krishnamurthy-i ashi.
Tesüiba mapang amshiba paper ballot system nung tim mesüi inyaktsü akok, paper akoksar aser results metettsü mapang agir, ta pai ashi.
EVMs ya linük asoshi konang ka lir aser ashisshiteptsü kecha mali. Ajisüaka, political party kari paper ballots amshitsü takhangba agütsüba atema kanga sasa bilemtsür, ta Krishnamurthy-isa shisem.
“Election nung party kari tamakok angur ta sür EVM majung ta ashitsü makok. Anungji, EVMs mamshiii paper ballot amshira nibo ibaji langtsüngleni aluba inyakyim ka ta ashitsü. EVMs dak ashishiteptsü kecha mali” ta paisa metetdaktsü.
Paper ballot system ajanga election results metetdaktsütsü atema hopta ka shi agitsü. Iba nung paper aika akoksatsü aser ballot box nung tim mesüi inyaktsü lenmang aisü lir. Election kar nungbo bogus ballot paper amshiogo aser EVMs nung aliba ama ballot box system nung tim masübatem noktangtsü kecha mali, ta taoba CEC-isa ashi.
Tang linük kari asen linük nung EVMs amshiba inyakyim saklokba metetdaktsüogo saka asenoki EVMs amshiba anenra, asenoki tejakleni masü saka langtsüngleni alur ama asütsü, ta paisa shisem.
Taoba hopta tu Congress-i Election Commission dang taruba election tem nungbo EVMs melena paper ballots amshiang ta ayongzüka liasü.
EVMs nung tim masüba mapatem inyaker ta Congress indang 84 buba plenary session nung party-i metetdaktsü.
Ano, tanga political party kari election mapang EVMs nung tim masüba mapa inyaker anungji ballot paper system tenzükang ta takhangba agütsür.
Party ajaki paper ballots amshitsüla ta bilemra taruba election tem nung EVMs melena paper ballots amshitsü asoshi bilemdangtsü ta BJP-isa Amungnü (Deobar) metetdakja liasü.