Paper mill nung inyakertem longkak aitba anenogo; AKM & LKM-i paper mill nung inyakertem pusemer

NPPC Ltd nung inyakertem anogo asemnübuba NH 2 nokdanga longkak aitba noksa nung angur. Tzüdikong, August 13, 2017.

Dimapur, Aug.13 (TYO) : Nagaland Pulp & Paper Company Limited (NPPC Ltd) nung inyakertemi yakanü August 11, 2017 nü nungi tenzüka National Highway 2 nokdanger longkak aitba sentong Deobar aonung nungi lapoktsüogo.
NPPC Ltd nung inyakertemi parnok nem taoba ita ter ita sen magütsüba, paper mill shia arua melapoktetba, mapa inyakertem nem tangutsü tim teyari nagütsüba aser parnok ngua aliba ita sen scale meyipa mereprangshitsüba atema anogo kecha telatteba maka parnoki akangba mataloktsü tashi longkak aittsü terenemba nung National Highway nokdanga yur longkak aita kiasü.
Aji oda, NPPC Ltd nung inyakertem tangutsü tim ita sen aser teyaritem dang masü saka Naga nunger ajak ajangzüktsü asoshi paper mill lapokshitsü tim ta takangba agüja longkak aitba sentong anogo asemnübuba Deobar nikongdang Mokokchung Depury Commissioner-i Tzüdikong nung longkak aitertem ajurua, anogo 20 tsüngda parnok tangutsü tim ita sen agütsütsü aser tanüngba takangtemji yaktasa mapa küma inyaktsütsü asoshi jembiteptsü nangzükba sülen Deobar aonung nungi NH 2 nokdanga aliba lapoktsüogo.
Tzüdikong nung NPPC Ltd tanaben melapoktetba tamakok den ano yangji inyakertem nem ita sen dena ita ter magütsüteti timtemdaktsüba tia ngua, Ao Kaketshir Mungdang (AKM) aser Langpangkong Kaketshir Mongdang (LKM) nati Nagaland government o Hindustan Paper Corporation (HPC) na dang kanga mepelaba metetdaktsüogo aser yaktasa mapa inyakertemi akangbaji atalokjang ta takangba agütsüogo.
Nagaland nung heavy industry ka dang aliba paper mill ya tanaben lapoktsübaji Ao kin dang masü saka Naga nunger ajak taginüba lir, anungji NPPC Ltd nung inyakertemi nokdakbaji Naga nunger ajak asoshi lir, anungji AKM-i tashi ajak agi nungittsü ta kaketshirtem telongjemisa metetdaktsü.
India government-ibo paper mill lapokshitsü atema sen agütsüogo saka kechiba melapoktetter ta AKM-isa state government aser HPC nem tasüngdangba ka agütsüogo.
Kasa maparen nung Langpangkong Kaketshir Mongdang (LKM)-ia paper melapoktetba aser yangji inyakertem nem ita sen dena küm junga magütsütetba atema state government aser HPC dang kanga jashir ta sangdong ka ajanga metetdaktsüogo.
Ita ter tashi ita sen mengui aoba kibongtem aser parnok chirnur tiaji komaka timtemdar asütsü . Iba ama mapajibo meimchir temeten anema lir ta LKM-isa metetdaktsü.
India governemt-i paper mill shia arudaktsütsü asoshi sen crore 500 agütsüba mapang paper mill ya shia arudaktsütsü tenzük asübo, teinyakdak nung meperiba dena meshisema inyaka lila ta LKM-isa tesasaba ka state government dang metetdaktsü.
Iba ama pei lima aser nübortem akoksatsüsa inyakba mapatem anema lokti aser senso ajaki ola adoka asen lima yanglushiba nung shilem agidi ta AKM aser LKM nati mepishia metetdaktsüogo.