Paper Nagar nungi Tzudikong post office ta melenogo

Dimapur, July 5 (TYO) : July 4, 2016 nü Tzudikong Town nung Ad-hoc Town committee-i (ATC) ayonga Paper Nagar post office nungi Tzudikong post office ta tenüng melenba sentong ka ayongzüka agi.
Iba sentong nung Industries & Commerce Parliamentary Secy. Amenba Yaden tongti tesemdanger liasü.
Sentong nung ward ajak nungi lenirtem, Industries/Business Unit nungi kiburtem, 21 Tuli A/C party workers, NPPC Ltd nungi Management & workers Union, School, Arogo aser NGO tem ajak nungi nisungtem aden.
Talisa taoba mapang TATC nung lenirtem T. Rongsen Jamir, L. Temjen Jamir aser L. Tongpang nungera arua shilem agia aden.
Iba post office nüngja Paper Nagar tasür 21/05/1979 nung lapok, iba sülen Tzudikong Yimten-i anir Ao Kaketshir Mongdang (AKM)-i Tzudikong post office ta melentsü aiben inyaktepa aru, saka mapa mekümteti küm 37 tashi arur, tang iba mapa takok anguba atema kanga pelar, ta Tzudikong Ad-hoc Town Committee Secretary, L. Chuba Jamir-i sangdong ka nung metetdaktsü.
Iba post office nüngja melentsü inyaktepba nung yariteper ajak dang TATC-i kanga pelar. Talisa Sentiwapang Aier ADC Tuli aser AKM lennirtemi DPDB Mokokchung nem angatetdakja nüngja approved südaktsüba atema kanga pelar. Ano, lennir tajung, Mangkolemba ADC, Imtiwapang-i Tzudikong yimten senzütsü melen paper ajak Shillong tongja jembitsüba atema pelar, ta sangdong nungsa shia lir.
Ano, tongtipangsa Post master General NE Circle Shillong, Pangernungsang Lemdor-i Director General of Postal service Govt. of India office den tanen makai osang agitepba mapa takok tulu ngua inyaktsüba atema tenüngsang tulu agütsür, ta Tzudikong Ad-hoc Town Committee Secretary-isa sangdong metetdaktsü.