Paper nung züluba otem mesüra ocet-tem ya tangar jilo ia masü, saka pei dak apetba zülutsüla

~ R. Imkong Lkr, Dimapur.

Koba paper nung südir süaka shibaisa osangtem agütsüba paper nung ocet-tem mesüra tanga osangtem zulur, itemji nükjidong tejangja ka ka yur angsa adoktsür ta asenok paper azüngertemi angateter aser amanger. Yamaji kari ocet ka paper nung zulutsübaji nüburtem asoshi apet asü mapet ta kanga junga shisadanger kelenang zulutsü nungbo nüburtem aika asoshi tajangzük tulu angutsü ta asüba olen ka lemsateper. Kechiyong tanü putu mapang ya joko English nunger aso metsü ser ka puba nung jajadagi, iba denji külemi alima ya tashi temetet nung joko tejakleni talangka odagi. Anungji ocet temalen shai aliba dakji ajemdaker pei pei tangatetba temji jangja jangja zulutsü nung-bo ajak atema tajangzük tulu asütsü ta shitsür.
Yamaji, ashiba amaji 2 Timoti 4:7 nungji “Ni rara tajungji raraogo, ni alizüngji tonga asemogo aser ni tamangji yuogo” ta asüba oren ya aikati mapang shia tasü tama ajuruba mapang nung zulutsüba angudang kagna süngmangasa azünger. Kechiba ta süra iba o yabo sayutsüngir tulu temeshi nisung Paul-i ashiba otem lir. Saka pa yabo Tsüngremi pa yimli atema asaa mezüja shimtetba nübu ka ta temeshi lai ajanga kuli angur. Kenü anogo, kibuba Tsüngremi Anania tang mangdang nung jembia ashi, na oang, kechaiser bendangertem, chubatem aser Israel chirtem dangi küm nüng abentsü, pa ni asoshi kü teshimtetba marok lir ta jangja jangja shia angur. T.Mapa 9:15. Aser Paul-i nisung ka pa tasodang nungi khen agi mejajadangba iba anogo nungjagiang Paul-i pa teka nung ammer atsümesoa jajadaktsüba angur. Yamajisa ano asangur ka tenüng agi Eutuka ta aser Pauli sayutsüngiba mapang nung kanga anünü ta shia angur, aser paji kijiba nung mener kanga anünüa alitang aoksa ka takdang temalen tapu asempuba nungi tsük aser tasü bener atu. Saka Pauli asanguba atemaji Tsüngrem tang sarasadema tasü nungi shai arudaktsü aser yangji telok sentepa aliba purtem nem pa takümji meyipa agütsü, aser parnok ajak kanga pelatepa anisüngzük angu. T.Mapa 20:9-10. Aser ano Paul aser tangar telok aeini aortem Publio ta ajaba aset-kong ka nung anisüngzüka alitang, Publio tebo Ramen aser azüsen agi kanga shiranga liasü, idangji Pauli pa dakji teka agi nemeta sarasademja anebtsü, aser ano yangji aliba yimertem tashidak tamajung aketertem ajak pai sarasademja anebtsü ta shia angur. T.Mapa 28:8-9.
Iba amaji Tsüngremi shimtetba nübu ka den medemdanga “Ni rara tajungji raraogo, ni alizüngji tonga asemogo aser ni tamangji yuogo” ta o tajung aika pei dak mapetba amshia tasü tama ajuruba mapang nung pei kinüngertemi paper nung adoktsüba yabo Tsüngrem tsüngdang temeden ngudi ma? ta nibo aibensa bilemdanger. Kechiba ta süra asenoki amanga aruba nung tanela tekümtet tejangja kar ta pei sasa kuli agütsütet-tsüla, ajita mesüra koda ser asenoki temeshi nisung sayutsüngir tulu Paul ama temeshi nisung ka den medemdanga paper nung adoktsübaji kanga tamashi tangatetba ta nibo angateter. Kechiba ta süra asenoki Paul-i inyakba amaji tasürtem kwika shai arudaktsü? Mesüra tashidak tamajung aketer kwika anebtsü? Aser Kibuba tsüngdang koma ajemalua liyonga aru? Iba amaji mapa tajung kar tanga inyakteta mekara koda ser temeshi nisungi ashiba o amshia paper nung adoktsübaji kanga tamashi tangatetba ta tazünger, ocet zülurtem aser tangashri ajak nem rajemdaktsüner.