Paper Wars

~  T. Nokpang Jamir.

1st paper war lai puti metetertem tsüngda Efesa tapu 1 tekong 4 nung tangatetba balala adoka küm pungo shi zülutepa aser aitsütepa aru aser aika pei angatetbajiang shitak ta bilema shitakba mejangjai süitema ogo.
Ano, 2nd paper war Eden atsü ki nung sendakba onük ka nung 2014 küm piyong aitsütepa zülutepa süidaktsüogo aser taküm küm,
3rd paper war – Anempong aser züngya züngko onük nung zülutepa aitsütepba, joko ita asem aor. Tamalen September ita nung osangkaket ajanga ABAM-i sangdongbaji nibo mangu saka iba onük nung ABAM aiben tetshitsüa angur, anungji ABAM- jia amaadokdi aser kong nungi tenzük ajia mebushili saka Kibuba Yisui pa alima nung alidang ashiba otem to dang bilemdangdi aser kati ka maitsütepi metongshitepdi, aser ano Pauli putu tatembang nung koda ataloktsü item ajak ya züluja medoktsü no?
Alemli nungi asen Aortemi anogo terok, ak terok aser troknü sülen ajurutepdi tasa jimbitepa aru aser anogo mesüra hopta 6 sülen ajurubajibo nisung taküm ishikabo samar dangsa tembanga aru, anungji kati ka maitsütepi yabo tanelai memelaba ta angateta tasen lai dangi meyipdi ta ayongzüker. November 4 paper nung iba anempong onük zulua aliba to züngdanger nia oren kabo züludi ta sarasademer tenzük nung, kü mulongjang nung nenok yimer dak atalokba otsü zülua ajungshitepang ta ajungshiba ajanga tanü ya lemsateper. Ibai ataloker joko küm 90 jungnüa arur.
Onok yim asem ali ka asoshi raktepa keyi pu tebokma ka azüngashia ngushitep. Parnok asemprongla iba aliji ozü meyong ta azüngashia ngor doktsü aser shiba dak tama langka atalokdir tasa repranga ataogo südi, kechiyong asen Aortemi anogo mesüra mapang atakteter shiba dak tama langka atalokdir tasa anemponga reprangtepa liasü. Yim ka nung tambosanger kilir tajung ka asü aser tanüngba yim ana nungjia tasüba tapu balalasa atalok.
Tang Yisu tanelai asen kin dang ashibaji, akhi tejen mapatemji ano amshidi süra shiba dak tama atalokdir ta reprangtepa teli. Keyi pu teraksa angoba ajanga parnok ajak aibelener küma merenshiba ama temeten kecha mesayui ajaklen kasasa merenshitsü ta züluang ta ashibayong ni tanü ibai zülur.
Koba keyi pu bokmar aliba ka indang züluba ya akhidang British nunger Mokokchung mesemteter yimsü süa aliba mapang bena arua ayuba tanü asüng dobashi court nung asü mesüra DC malkhana nung yua ali ni mejangja saka mesamai yua alitsü südi. Yisu tanelai Ao kin dang ashir, ” item tila tanurtem ka danga samadaktsüra pa asoshibo tekong nung lungpak taret ka alenloker tzü nung angüma asü tajungba, shirnok asenoki sayuteta anitet item ajak dang ta Tanelai ashir, parnok aibelena manitsü asoshi kümdangtsü ashir. Aorbo yamaji – yamaji inyaker ta mashitsüsa tamajung leni parnok manitsüla. Yabo kibubai ozüng agütsür.