Pappu Yadav-i Parliament nung North East atema jembitsü nangzük

Kohima, December 4 (TYO) : North East Region nung terenlok maliba aser tejakleni maoba angudang sasa bilemer aser iba asoshi Parliament nung ni northeast pur atema ola adoktsü, ta Lok Sabha MP, Rajesh Ranjan (Pappu) Yadav-i tanü ashi.
Kisama nung Hornbill Festival mapang osangbener senden ka nung jembidang Pappu Yadav-i ashiba agi, “tesüiba küm 70 shi tsüngda Assam, Meghalaya aser Manipur state tem nung terenlok kar aliba dak alaka tanüngba northeast state tem nung terenlok mali aser ibaji talisa Nagaland nung lir.”
Madhepura, Bihar nungi Jan Adhikar Party (JAP) MP Pappu Yadav aser pa kinüngtsü Congress MP, Ranjeet Ranjan nati tanü Hornbill Festival anogo pezübuba nung tongti tesemdanger ama shilem agi.
Centre nung BJP-i aniba NDA sorkar nung JAP ya teyariteper telok ka lir.
“Centre sorkari Scheduled Tribe pur renlokdaktsütsü aser tejakleni odaktsütsü atema jembir saka education sector nung ST purtemi tangar memeneper. Northeast tesem nung ST pur nütsüng yongsük teimba lir saka sector ajak nung terenlok mali. Taruba Parliament session nung ni northeast renloktsü atema onüktem benoka jembitsü” ta Pappu Yadav-isa ashi.
Paisa, Hornbill Festival tenüngsanga jembidang, “iba benjung ajanga lisopurtem longjemba aser state tashi aitba sayur” ta ashi.
Centre-i sen anentsüba dak sendakba nung olen ka ashidang, Pappu Yadav-isa “sorkari inyakyim tai ka inyaker. Mezüng BJP-i parnoki ozüng alema amshiba sen melenba sülen tang nübortem timtemdaktsür” ta ashi.
Ozüng alema amshiba senji Panama aser Swiss Bank nung rizünga yua lir aser iba senji election, movie yangluba nung amshir aser ano tamangba yimsü dak sendakba guru temia amshir, saka sorkari parnok dang kecha meshitetba yong kecha mesütetba nisungtem kangshidaktsür, ta paisa shisem.
“Sorkari senpak 2000 mamshidang tamasa sen jenjang tilatem tamasa amshi nung jungle. Sen anentsüba inyakyim ka khenyongi tai lir aser ozü party-i iba inyakyim menungiter” ta Pappu Yadav-isa metetdaktsü.