Papua New Guinea nung 7.9 magnitude menoknok anok

Sydney, January 22 (Agencies) : Deobarnü Papua New Guinea nung menoknok tesashi ka 7.9 magnitude nung anok aser Pacific asetkong linüktem nung tsunami arutsü sangdong, ajisüaka iba yipruji marutsü ta tanaben sangdongshiogo, ta US Geological Survey sangdong ka ajanga metetdaktsü.
Panguna anüolen tsütsü Bougainville asetkong, Papua New Guinea nungi kilometer 40 (25 miles) pilar ali telunglen kilometre 153 lur iba menoknok anok, ta kasa sangdong ajangasa shi.
Pacific asetkong linüktem nung Tsunami arutsü metetdaktsüdang tzüsem feet ka nungi asem tashi arutsü ta sangdonga liasü.
Ano anasa aliba linüktem nunga Tsünami jagi terara kongshitsü, ta shia liasü
Papua New Guinea nung iba ama magnitude nung menoknok anokba ya tang tasen masü. Papua New Guinea dang ya Pacific “Ring of Fire” ta ajar kechiba süra iba tesem nung tectonic plates tsüktepba ajanga menoknok kanga bulua anoker.
“Iba menoknok ali telunglen kilometre 150 lur anokaka magnitude tesashi asüba ajanga ali dena anokshidaktsür,” ta Geoscience Australia seismologist, Spiro Spiliopoulos-i ashi.
Iba menoknok ajanga teraksa adokba osang kecha mali.
Australia aser New Zealand naprongi iba menoknok ajanga timtem agütsütsü aliba asadangogo saka lendong arutsü kecha meputet ta metetdaktsü.
Yaküm December ita tom nunga 7.9-magnitude menoknok ka anoka liasü saka takoksa kecha matalokba den tsunami arutsü sangdongba marui süi.
2013 küm Solomon asetkongtem nunga 8.0-magnitude menoknok ka anoker külem tsunami aruba ajanga nisung 10 asü, ki noklang aika raksatsü aser nisung meyirjang aika talidak makai aküm.