Para Military Force-i teyari agütsü

Kohima, Rongchii/April 09, 2020 (TYO): Chiephobozou, Botsa, Jakhama aser Kezocha tesem tashi relief osettsütem belena aser lema agütsütsü asoshi April 09, 2020 (Brehostibar) nü 93rd BN BSF Chedema den Ram Chandra Commandant (AOL) lenisüba kübok 78 BN CRPF Zubza longjemer Kohima District administration nem teyari agüja liasü, ta sangdong ka ajanga metetdaktsü.
Alima ajunga asüngba Coronavirus wara ajanga India nunga maparen ajak shibanger aliba mapang ka nung, Kohima district kübok anogoshia ayangertem, pei pei talidaki moteti alir raliwalirtem/ainlen senzür aser kaketshirtem, shirnok nüngdakba osettsüsettem malitetti timtemseta lidar, parnok nem Kohima District administration ajanga March 31, 2020 nüngi tenzüka relief osettsüsettem lema agütsüdar.
Tanü tashi nung, Kohima District administration-i Kohima Municipal Area kübok nisung 30,000 dak tema nem relief osettsüsettem lema agütsüogo aser iba den külemi Kohima district kübok sub-division aser yimtsüng balala nung alemtsü asoshi District administration-isa jang-o-tzü den nüngdakba osettsüsettem truck sünga oshir yokogo.
Maneni, nüngdakbapurtem nem anogoshia item relief osettsüset lema agütsütsü asoshi SDRF aser tentet balala nungi volunteers temi Kohima district administration maneni nungita yaridar, ta kasa sangdong ajanga metetdaktsü.