‘Paradise Papers’ nung India nunger 714 densema lir

New Delhi, November 6 (Agencies): Hombar nü ‘Paradise Papers’ ta ser alima nung tashi aliba nisungtem aser company temi ozüng alema sen bendenba osangtem yimjak nung metetdaktsüba nung India nunger nisung 700 dak tema lir.
Iba bushisüngdangba mapa ya International Consortium of Investigative Journalists (ICIJ) ajanga inyak saka parnoki tetshiba nisung aikati aibelen mapa kecha meinyak ta kuli agütsütsü tenzükogo.
India nunger rongnung Bollywood star Amitabh Bachchan, businessman Vijay Mallya, corporate lobbyist Niira Radia, film star Sanjay Dutt kinungtsü Dilnashin, union minister Jayant Sinha aser Rajya Sabha MP R.K. Sinha nungertem dena lir.
ICIJ atema India nung media partner ji The Indian Express lir aser parnoki ashiba agi, iba bushisüngdang mapa nung alima tesem balala nungi media partners 95-i yaritep.
‘Paradise Papers’ nung linük 180 dena lir aser linüktem rongnung India jenjang 19 buba nung lir. Iba osang nung India nunger ajak agi 714 densema lir.
Iba osang yimjak nung metetdaktsüba sülen India nung opposition tongti telok- Congress-i Prime Minister Narendra Modi-i bendanglen ozüng alema sen miima rizünga aliba atema mapa kecha meinyaker ta aitsüogo.
Modi-i nübortem ashioktsüogo ta Congress-i ashi aser parnokisa Union minister Jayant Sinha aser Bharatiya Janata Party (BJP) MP R.K. Sinha na mapa nungi anentsü atema takhangba agütsü.