Paramilitary sepaitem meyipa yoktsü: CM Mehbooba Mufti

Srinagar, October 17 (Agencies): Tanü Jammu & Kashmir Chief Minister, Mehbooba Mufti-i, Paramilitary sepaitem ya koda masüba ajanga Kashmir-i yoka lir, anungji tensa süngjemba sülenbo tekaraba nung parnok meyipa yoktsü, ta metetdaktsü.
Chief Minister-isa tsüraburtem dang, pei chirnur tarutsü tia atema bilemja tensa süngjemtsü atema sorkar den yaritepdaktsüner, ta mepishiogo.
Taruba ita board examinations agitsü aliba anema longkak aitba dak sentakba nung lai, kaketshirtem academic mapang nung takoksa mangutsü atema board exams ji mapang shitak nung agitsü, ta ashi.
“Kaketshirtem nem options timba agütsütsü (tasüngdangba atema telangzübatem), kechiyong Kashmir tensa ajanga parnok study junga mesütet,” ta laisa ashi.
“Ano sorkar school tem nung azünger kaketshirtem tatidang atema renemshitsü asoshi onoki tuitions atema anepalutsütsü. Onokisa syllabus ajema kümtsütsü, saka tatidangjibo lemteta aliba ama mapang shitak nung agitsü,” ta laisa metetdaktsü.
Mehbooba-isa state nung tetsürtem aser tetsür kaketshirtem ajangzüktsü atema lar sorkari mera agibatem metetdaktsü. Item rongnung tetsürtem atema temeja bus, temeja police stations, Ladli scheme aser Scooty Scheme densema lir.