Parashuram Waghmare-i Gauri Lankesh khaset: SIT

Bengaluru (Karnataka), Aami/June 15 (Agencies): Journalist, Gauri Lankesh tepsetba ken o nung nisung trok puogo aser parnok rongnung Parashuram Waghmare-i la khaset, ta tanü SIT-i metetdaktsü.
SIT nung ketdangser kati Lankesh khasetba kasa prangpong jagi rationalists- Govind Pansare aser MM Kalburgi nata khaset, ta metetdaktsü.
“Waghmare-i Lankesh dak injang khaloktsü aser forensic report ajanga kasa prangpong jagi (rationalists) Govind Pansare, MM Kalburgi aser Lankesh nunger khaset ta jangjaogo,” ta ketdangserisa metetdaktsü.
Ajisüaka tang tashi prangpongjibo (pistol) mengutet, ta pai ashi.
Pai ashiba agi, Hindu right wing telok balala nungi tentetba tentet nungji state pongu nungi züngsem 60 shi lir.
“Iba telok ya Madhya Pradesh, Gujarat, Maharashtra, Goa aser Karnataka nung network lir ta onoki jangjaogo. Ajisüaka tang tashi nungbo parnok Uttar Pradesh den tesendaktep alibabo mejangjar,” ta pai ashi.
Praveen ta ajasang Sujith Kumar-i iba telok atema züngsemtem shima liasü, aser pa dang asüngdangyaba ajanga iba network ji jungkai adok, ta ketdangseri ashi.
Yaküm September 5 aonung Bengaluru nung Lankesh’er kima la khaset, aser iba ken o nung maneni melung melemi nisung asem bushidar.
La tepsetba aonung la kima CCTV camera noksa nung adoksang nisungbaji Waghmare lir ta bilemer.
“Iba telok yagi Prof K S Bhagawan (Kannada writer) tepsettsü mapang ana nung lia onoki parnok apu,” ta ketdangseri ashi.
Tawa Karnataka police-i Bhagwan tepsettsü asalentong yangluba puteta liasü, aser iba dak sendakba nung nisung pezü pua asüngdangyaba mapang nung parnoki Lankkesh tepsetba nunga shilem agia alitsüa akok ta parnok dak melung malem.
Tawa SIT-i melung melemteti alirtem kaket ka angu, aser iba kaket nungji parnoki tepsettsü atema tenüng züluba tarensen ka liasü, ta ketdangseri ashi.
Iba kaket nung aliba tenüng rongnung Bhagvan dak alia film nung inyaker, Girish Karnad, taoba mapang minister aser kaket keno zülur, B T Lalitha Naik, rationalist C S Dwarakanath aser pontiff Veerabhadra Channamalla Swamy nunger densema liasü.
Parnok ajaki Hindu right wing anema jembia arur.