Paris amakba ya US-i Syria, Iraq nung inyakba mapa ajanga lir: Azam

Bareilly, Nov. 16 (Agencies): Mangatettep ken o tulu adoktsüsa tanü Samajwadi Party lenir aser UP minister, Azam Khan-i, IS-i Paris yimti amakbaji alima nung tashi aliba linüktemi Syria aser Iraq na nung parnoki inyakba mapatem ajanga lir ta angatettsüla, ta ashi.

IS-i Paris amakba atema Khan-i aitsüogo ajisüaka pai, “MiddleEast nung aliba linüktem nung totzü nungi ochimashiba sen ajanga Europe nung aliba yimtitem mesangwadaktsütettsü,” ta ashi.

Khan-i, “Iraq, Syria, Libya aser Iran nung aliba totzü reserve tem ozüng alema agia aazükba sen ajanga nenoki Paris ama yimtitem sangwadakja, yi aser party sobaliba kanür asü(?) Iraq aser Syria na nung melung melemi IS junga amenoka aliba tesemtem nung bomb pokdaktsüba ajanga tai maket nübur merirjang aika talitak makai kümogo. Iba atema telangzüba tajung kechi agütsür(?),” ta ashi.

Mepetmesü aser rara aliba tesem nung US aser Russia nati shilem agiba aija Khan-i, “Anüdoklen aliba tashi aliba linüktemi Libya, Syria, Afghanistan ama linüktem raksatsüogo. Iba kuli ya- Parnoki item linüktem nung tashiyim amshia totzü reserve agia pei yimtitem sangwadaktsünüba ajanga lir, aser ibaji tim masü,” ta ashi.

Anüdoklen aliba tashi aliba linüktemi tim masüba lenmang ajanga tashi arishir ta shia Khan-i, “Nenoki sen aanüra nenoki India nunger ama meranga inyaka sen aazüktsüla,” ta ashi.