Paris amaker kiralongrar ka indang maitsü jangjaogo

Paris, November 15 (Agencies): Islamic State-i inyak ta tenüng agiba Paris amakba lendong nung kiralongrar tenet liasü aser parnok rongnung France police-i nisung ka indang maitsü jangjaogo.
France ketdangsertemi ashiba agi, nisung timba tepsetba Bataclan concert hall nung parnoki temeyong ka nungi arishi küm 29 tain Omar Ismail Mostefai indang maitsü jangjatet.
“Bataclan concert hall nung Nisung 89 tepsetba kiralongrartem rongnung Mostefai densema liasü aser pa sasa bomb agi pokset, saka iba tesem nung anguba temeyong ka nungi pa maitsü metetogo” ta ketdangser kati ashi.
Mostefai ya ozüng alema mapa inyaker ka liasü. 2004 aser 2010 tsüngda pa tilateri ken o 8 tashi nung aija liasü saka khen danga tepuokdak mayu, ta paisa shisem.
2010 küm Mostefai ya tali bilemloka aoertemi tenük yoktsü akok ta züngshi saka Hokolbar matongdang tashi pa anema bushisüngdangba mesüra kiralongrar telok nung züngsem akümba osang kecha maliasü, ta Paris prosecutor Francois Molins-i osangbener dang ashi.
Police-i Mostefai tebu aser tenu na parnok ket nung yua lir aser tena dang asüngdangya asütsü tenzükogo.
“Iba ya mamangteter, iba ya yiari inyakba mapa ka lir. Yashi ni Paris nung liasü aser lendong atalokba kü tenüng agi nguogo” ta Mostefai tenui osangbener dang ashi.
Mostefai iba amakba mapa nung densema liasü ta osang angashiba sülen tenui pa sasa police ket nung bendanga agütsü.
Küm ishika tejaklen pai tedi Mostefai den tesentaktep raksa. Tedii ozüng alema mapa inyakba pai meteta liasü saka pa tali bilemloka aoertem den adentsü ta ni kodanga mebilem, ta tenuisa osangbenertem dang ashi.