Paris climate tenangzükba mapa küma inyaktsü nangzüker: May

New York, September 21 (Agencies): Britain linüki yaküm, 2015 küm France yimtiba, Paris nung agiba alima tali tatsükba kümdaktsüba maparen azüoktsü tenangzükba taküm, 2016 küm tatemlen tashi nung mapa küma inyaktsü tenangzükba olen ka Britain Ato Kilonser, Theresa May-i alima lenirtem matsüngdang nangzükogo.
United Nations (UN) tesepti, New York yimti nung amenba United Nations General Assembly (UNGA) senden nung tan mezüngsüa shilem agia, May-i iba tenangzükba olenji yashi, Mongolbar nü metetdaktsü.
“Paris yimtiba nung yaküm, 2015 küm December ita amenba climate senden nung agiba alima tali tatsükba akümbaren azüoktsü tenangzükba taküm küm tatemlen tashi nung mapa küma inyaktsü nangzüker,” ta lai nangzüka ashi.
Alima lenir ajungai yaküm Paris yimti nung agiba alima tali tatsükba akümba aser iba ajanga alima tsüngsang mupong balaka küma melenshidaktsübaren tajemba kümdaktsütsü asoshi agiba tenangzükba mapa küma inyaktsü tayongzükba olen ka France Tir, Francois Hollande-i taoba August ita sangoktsüba osang jangjaogo.
“Meimchir indang tarutsü jenjang tajungba kümdaktsütsü nükjidong nung ozü Britain sorkari alima tali tatsükba akümbaren azüoktsü mapatong nung nangzükba ama, takok ngua shilem agitsü temulungtetba lir,” ta May-i nenshia ashi.
Britain tenüng nung par lenila, May-i sangoktsüba tenangzükba olen pela agizükba osang sangoktsüba den külemi, Britain linüki miim aketba carbon tango kanga sashia adoktsübaren azüoktsü mapatong takok ngua inyaktsü atema Britain shishilembartemia Britain sorkar den amalitepa alitsü renemba osang ka Confederation of British Industry (CBI)-ia metetdaktsüogo.