Paris Climate tezüngzüktep alima ozüng akümer

United Nations, November 04 (Agencies): Paris nung alima linük lenirtemi yaküm, 2015 küm tatemlen agiba alima tali tatsükba akümbaren azüoktsü tezüngzüktep alima ozüng ka tanü, Hokolbar nü kümtsüogo.
Tan Paris tezüngzüktep ozüng kümdaktsüba ajanga alima lenirtem rongnung scientist-temi bushitetba dang nungi alima kanga agi tali tatsükba küma, alimar tsüngsang mupong balaka melenshir ta tangatetba aliba kuli angur.
Tanü tashi nung alima tali tatsükba akümbaren azüoktsü tenangzükba agir rongnung alima linük 96 tashi densema lir saka ibaji alimai adoktsüba greenhouse miim tango shilem asem nung shilem ana dang lir.
Tarutsü anogotem nung alima tajemba agi Celsius degree 2 agi temokongba kümdaktsütsü tezüngzüktep agibaren nung tanüngba alima linüktemia densemtsü renemba osang angazükogo.
“Paris tezüngzüktep takok ngudaktsütsü atema nungdakba tongti shilem agitsü ajungshitsü atema United Nations (UN) General Secretary, Ban Ki-moon-i alimar lokti tentet lenirtem dena senden amentsü sentong renema lir,” ta UN otongdar, Stephane Dujarric-i metetdaktsü.
“Alima yimsüsür, scientist, tamangba yimsü lenir, shishilembartem aser lokti tentet balala nungi lenirtemi Ban pusema nungittsü tenzükba ajanga pai ayuba alima tali tatsükba akümbaren azüoktsü mapatong tan takok ngua inyaktsüsa tongti mera takok ngua agir lir,” ta lai shisem.
France yimtiba, Paris nung alima linük 192 nungi lenirtemi Climate Change senden mena, Paris Climate Change tezüngzüktep yaküm Decmeber ita agia liasü.
“Paris tezüngzüktep agiba sülen alimai rülong yimsaba, tzüyim nung tzü timba akümba aser temo aliba alimang lisemli kümdaktsüba densema, alima talitsü mejungi akümbaren azüoktsü mera takok ngua agitsü tenzükogo,” ta scientist-temia metetdaktsüogo.