Paris Hilton-i lajar yariner

August 07, 2015: India nung lajartem anepaluba tesem ka arua semdangba sülen Paris Hilton-i alima nung aliba lajartem yaritsü asoshi nükjidong ka yangluogo.

Lai, India nung lajartem anepaluba tesem semdangba sülen la melenshiogo, ta ashi.

Arishi küm 34 tain, DJ-&-socialite, Paris-i Asia nung AIDS tashidak keta alirtem anepaluba tesem ka semdangba mapang lai item tanurtem tia ngua parnok yaritsü asoshi mapa inyaktsü la shilem ka amai aküm.

Lai, “India nung lajartem ayuba tesem ka nung yua alirtem tsüraburtemji AIDS tashidak agi süma-adoker aser tanurtem jia tashidak keta lir tesa. Parnok ajak shiranger dang….ni item tanurtem tsürabur maliba den ano kecha maliba ngua kanga temulung raksa. Parnok lajartsürabur maliba den külemi tashidaka keta aliba ajanga town nung alirtemia parnok kanga mesen metui amshir. Ni temulung kanga amsa,” ta New You magazine den interview ka agiba mapang ashi.

Iba semdangba sülen Paris-i la aoba linük ajak nung lajartem ayuba tesem semdangtsü tenangzükba agi aser la aoba shia tanurtem nem kazütsü lemtsür.

India semdangba bilemteta lai, “Ni yangji aliba tanurtem nem kazütsü aser noksa yangludang amshitsü oset bener otsü. Iba mapang tanurtemi kü dang, ya kanga junger, shingaia onok mesemdanger aser tangari onok den ajurutepa kazütsü tsübur ta ashi. Parnoki ibaji ashiba angashia ni temulung kanga raksa. Tanur tasür item ya shingaia mezüngshir. Iba tebilemba ya kü mulung nungi metokor,” ta ashi.

La tang tarutsü atema kechi sentong lir ta asüngdangba mapang Paris-i, ni alima nung aliba lajartem nem teyari agütsü tebilemba lir, ta langzüa liasü.

Lai, “Ni tang aliba jenjang dak ajemdaker nibo tebilemba temai adoka jembitettsü saka karibo bilem yonga temai adoka mejembitettsüsa jenjang tepetzük nung lir. Ni kü taküm bendanga agüja item tanurtem yaritsü….ni kanga meranga inyaker aser kü dak tangar yarinüba mulungsentsü keta lir,” ta ashi.