Paris lendong: Alima asayartemi asükhu lemsateper

Paris, November 14 (Agencies): Islamic State (IS) kiralongrartemi France kübok Paris yimti nung yasüng, Hokolbar aonung lendong tesashi ataloktsüba sülen alima asayartemi France nüburtem den asükhu lemsatepba osangtem tanü Honibar nü metetdaktsüogo.
Peisasa pokseta asütsütsü mulungteter aser tongpang nung amshitsü prangpong abener telok kati Paris yimti kübok Stade de France stadium nunga lendong atalokdaktsüba osang jangjaogo.
Yasüng lendongji atalokdaktsüba sülen France aser Germany na tsüngda tasayadak friendly footall asaya tom nung anentsüsa akümba den külemi, France Tir, Francois Hollande densema iba asaya repranger nisung meyirijang jenti tsübotepa jenshia liasü.
Aji oda, France nunger Thierry Henry, Australia nunger Tim Cahill aser taoba Chelsea asayar, Didier Drogba nunger densema football asayartem; Gilles Simon aser Caroline Wozniacki na densema tennis asayartem; basketball asayar mongin, LeBron James aser alima ajunga nung tekaraba asemsang, Usain Bolt nunger densema alima asayartemi micro-blogging site Twitter ajanga sasa bilemba aser lendong ataloktsürtem aitsüba osang lemsatepogo.
Ano külen, tan lendong atalokba sülen Paris nung tan hopta tatembanglen asayatsü ayongba asaya ajunga thinenba osanga jangjaogo.