Paris lendong atalokdaktsüsang tepsetogo: Valls

Paris, November 19 (Agencies): France police ketdangsertemi Paris kübok St. Denis kiyong nung yashinep agiba kiralongrar mita amakba sentong nung tawa Paris nung lendong tesashi ataloktsütsü sentong atongsang, Abdelhamid Abaaoud tespetba osang jangjaogo ta France Ato Kilonser, Manuel Valls-i tanü Brehostibar nü metetdaktsüogo.

Police-i yashi ghonda 7 shi mita kiralongrartem amakba sülen Morocco toktsür Belgium nung senso agia alisang, Abaaoud indang tasümang injang agi kasar aliba bushitet ta pai osang jangjashitsü.

Tasümang indang temeyong maitsü tendangba sülen tasümangji arishi küm 28 tain Abaaoud aliba osang jangjateta liasü.

Police ketdangsertemi kiralongrar ta temulungi bilemer nisung 8 tashi yashi apuba osanga jangjaogo.

Ano, peisasa pokseta asütsütsü mulungtetba tetsür kiralongrar kati la temang nung alenokba bomb pokdakja la den külemi, kiralongrar tanga ka yashi pokseta südaktsü aser iba tetsürlaji Abaaoud kinünger aliba osang jangjaogo.

Ano külen, France nung emergency ozüng taruba ita 3 tashi atsülanga benoktsü telemtetba ka Parliament yimsüsürtemi tanü agiba osang ka Valls-ia metetdaktsüogo.