Paris Masters: Andy Murray final asayatsü; World No. 1 aküm

Paris, November 05 (Agencies): Britain nunger Andy Murray-i Serbia nunger Novak Djokovic den temaba jenjang ngua, tebur tennis asayar tarensen nung World No. 1 akümtsü jenjang tanü, Honibar nü ajangzükogo.
Canada nunger Milos Raonic yirua, tang tasayadak Paris Masters tennis asayamong tebur semifinal nung shilem magitettsüsa akümba ajanga Murray-i asayaji koka, final asayatsü jenjang ajangzük.
France nunger Jo-Wilfried Tsonga madak takok ngua asayaba quarterfinal asaya nung Raonic tetsüng yirua, pai tanü semifinal asaya nung shilem magitettsüsa aküm.
Tan walkover yimya agi semifinal asaya nung takok anguba sülen arishi küm 29 tain Murray-i America nunger John Isner den final asayatsü jenjang ajangzükogo.
Tan asayamong quarterfinal asaya nung tamakok anguba ajanga Djokovic-i maneni World No. 1 jenjang abentsü temeten mongutettsüsa aküm.
Tan World No. 1 jenjang anguba ya Murray-i tennis asayatsü tenzüker tan mezüngsüa tebur taresen nung temaba jenjang ajangzüker lir.