Paris mi lendong nung nisung 10 asü, aika yiru

Paris, Tsüklai/Feb. 05 (Agencies): South-western Paris nung storey ti tashi atongtepa tua aliba ki tulu ka nung mi adoka kinü tanur ka densema nisung ter asü, ta fire service ketdangsertemi ashi.
Iba lendong nung mi remseper trok dena nisung 30 dak tali yiru aser nisung kabo kanga mejungi yirur lir.
Iba mi lendong nungi nisung 50 apu ajanga kümzüka liasü. Iba lendong ya nisung kari asaa inyak südi, ta Paris prosecutor temi ashi aser police temi temulung melemi aliba tetsür ka pua lir.
Lendong nung linük saakdaktsüogo, ta France Tir Emmanuel Macron-i ashi aser fire service ajanga tasü ita nüburtem kümzükba asoshia tenüngsang agüja liasü.
Rue Erlanger ya nüburtem aliba tesem ka lir aser Parc des Princes soccer stadium anasa lir.
Mi ya floor tanabuba nung tenzük aser ayatirm 01:00 (00:00 GMT) anasa Erlanger street nung 1970s mapang yangluba ki ajunga nung prokshia yangji alirtem anasa aliba kilem nung mi aser mokozü nungi jembutsü meranga nungtepa liasü.
“Kitsük kirong lendong mapang alarm agütsüba ola ya 00:30 ako meta angashi aser tesem ajungalen mokozü liasü. Ni floor 8buba nung alir, temaba floor nung, anungji ni balcony ka nungi balcony kati aotsü merang. Aser onok kinük ka nung adenshi, tangartem yamaji ni alileni jena aru,” ta yangji alir kati osangbener dang ashi.
Bois de Boulogne park anasa aliba ki tulu nung mi remsepa nüburtem kümnzüktsü asoshi firefighter 250 shi yoka liasü. Floor temaba indang kichiba nungi mi adokba aser firefighter tem sübutsü tabensa sübur yangji aliba nisungtem agizüktsü merangba noksa nguogo.
“Onok iba tesem arua atongdang tensa mejungi kümer liasü. Nisung aikati kichiba nungi teyari meshia ayimtena liasü,” ta ketdangser kati ashi.
Iba kitsük-kirong lendong nung yirur alirtem rongnung firefighter trok densema lir, ta osang ajanga ashi.
Ghonda pongu shi lir mi ya remseptet, saka asürtem ya timba alitsü akok, ta fire service odongtar kati osangbener dang ashi.
Mi jangruba ya kimalen nungi amngutsüsa tesem ajaklen ki agi müketbanger liasü aser iba ajanga firefighter temi parnok indang gari mamshitet aser mi remsepba nüburtem kümzükba nung mapang talangba agitsüsa aküm.
Iba ki müketa aliba ki nungi nüburtem ainshidaktsüogo aser jila ketdangsertem dang parnok atsükoktsü asoshi tesem bushitsü metetdaktsüogo.
Osang kar ajanga ashiba agi, tetsür ka lar kidanger den mangatetep adokba sülen lai ki anasa anena aliba gari ka nung mi asentsü merang.
Iba tetsürla ya police temi pua lir aser asüngdangya asüba mapang ka lir.
Paris indang mayor Anne Hidalgo-i lendong nung asür kinungertem den asükhu lemsatepogo aser Interior Minister Christophe Castaner den külemi iba tesem semdangi aoba mapang lir, ta osang ka ajanga ashi.
Kasa tesem nungsa hopta ishika tejakdang am yangluba tesem ka nung mi lendong adoka nisung pezü taküm sama.