Paris nung India-i Pakistan-i kiralongraba yariba anema benoktsü

New Delhi, January 12 (Agencies): Taruba ita France yimtiba, Paris nung Financial Action Task Force (FATF) senden amendang US aser Russia linük nati pusema India-i, Pakistan-i senotsü agi kiralongraba anema inyaktsü atema benoka jembitsü, ta osang ka ajanga metetdaktsü.
FATF ya intergovernmental organisation ka lir, koba ajanga sen tim mesüi amshiba aser kiralongraba anema alima linüktem amalitepa inyaktsü atema inyaker.
Paris FATF plenary senden nung Pakistan nung amenoka aliba kiralongrar teloktem senotsü anguba lenmangtem asadangtsü, aser itemji nokdangtsü atema jembitsü.
Yaküm November ita nung Buenos Aires nung Financial Action Task Force senden alidanga US aser Russia nati pusema Narendra Modi-i aniba sorkari kasa onük benoka liasü, aser iba senden nung Pakistan nung nija aser telok balala kiralongra tarensen nung züngoka aliba atema tebilemtsü kaa jembia liasü.
“Parnoki (Russia aser America) nungitba ajanga November 2, 2017 nü FATF senden nung Pakistan dang kiralongrartem indang senotsü lenmangtem nokdangtsü atema inyakba osang agüjang ta bangjema tuyua liasü,” ta tawa ministry of external affairs (MEA)-i parliamentary panel- Parliamentary Standing Committee on External Affairs nem metetdakja liasü.
Tan ita parliamentary panel jagi Lok Sabha nem agütsüba osang nungji parnoki benokba onüktem nung MEA-i telangzüba agütsüba indang shia lir.