Paris nung lendong atalokdaktsüsang France tonga anir ogo

France yimtiba, Paris nung lendong atalokdaktsü ta temulung malemba nisung, Salah Abdeslam Belgium nungi Paris tonga anir aoba sülen Abdeslam Paris Police tesepti telungi anir aiba jakdang police ketdangsertemi memetetba lendong matalokdaktsütsü nükjidong nung Abdeslam jakdang kümdangshia jajaba noksa nung angur. (Paris, April 27)

 Paris, April 27 (Agencies): France kübok Paris nung yaküm lendong atalokdaktsüba ken o nung ajemdaker Belgium nung apusang, Salah Abdeslam Belgium nungi Paris tonga tanü, Bodbar nü anir ogo.

Paris yimti nung lendong kanga sashia atalokdaktsür rong nung tongti ta temulung melemi küma, Belgium police-i Abdeslam Belgium yimtiba, Brussels nung apu.

Mapang jilia osang kecha metetdaktsüi Abdeslam ajungbena Paris tonga anir aoba sülen par okatsür, Frank Berton-ia Paris yimti tonga aoba osang jangjaogo.

Abdelslam-i sorkar den amaliteptsü mulungba olen ka Berton-ia tawa metetdakja lir.

“Okadak ken o angadangba jakdang, nübur nem lendong bener arutsütsü akok ta temulung malemba nisungtem pua ayudak Abdeslam-a puoka ayutsü renemogo,” ta France Justice Minister, Jean-Jacques Urvoas-ia metetdaktsü.

Paris nung nisung 130 shi poksetdakja yaküm November ita 13 nü lendong atalokdaktsür rong nung Abdeslam dang taküm kümzüka osang bushiteta lir.

“Europe-i agütsüba pua ayutsü ozüng nung ajemdaker, Abdeslam France sorkar ketdangsertem nem taoba March ita 19 nü amoktsü,” ta Belgium’er Federal Prosecutor office-ia osang jangjashitsü.

Ano külen, Brussels kübok Forest district nung prangpong injang yoka lendong atalokdaktsüba ken o ka Belgium sorkaria Abdeslam anema taoba Brehostibar nü benokba osang jangjaogo.

Abdeslam France tonga anir aoba jakdang, Brussels yimti nung nisung 32 tashi poksetdakja tayimtsü anendak aser metro station na nung bomb lendong atalokdaktsüba den sentakba tasüngdangba sentonga Belgium sorkari Abdeslam den agia liasü.

Paris nung lendong atalokdaktsüdang pa pasasa pokseta asütsütsü asoshi sentong renemba saka iba sentongji tesülen melenshiba olen ka Abdeslam-ia ketdangsertem den lemsatepba osang angazükogo.