Paris nung mangyim

Taoba Hokolbar aonung France yimtiba Paris nung kiralongrartemi nisungtem longsulongsua adenshia alidak tesem asem pezüka nung injang bomb yoka nisung 127 khasetba den aika yirutsüba lendong atalokba ya Paris nung alirtem dang masü saka alima ajunga asoshi shisabolutsüka lir. Alima nung kiralongrartem samatsütsü asoshi American aser European nungertemi anir nübo aser rongsen tenla tululu agüja inyaker saka makoker, kechiyong kiralongraba mapaji pei lima nung senso küma intettertemi inyaker. Ibaji asenok asoshia tekümdangtsü osang ka lir. Atangji, Muslim nunger ajak kiralongrar masü saka asenok ajak asoshi tia majung kaji kiralongra mapa inyakertem ajunga Muslim nungertem asür. Ibayongji, tai maketba Muslim nungertem dak dena temulung malemtsüsa akümer. Iba ama bilemba jagi tanü US nungbo Muslim nungertemi aniba gari nung dena amentsü nisungi tsübua bilemer. Iba kasa tetsübuba shisatsü ka Paris nung alirtem daka alitsüa akok. Paris nung alirtem ya mapang endoka chiajema pelatepba kazütsü jangrartem lir. Aji oda, kiralongrartemi item ama tesemji shimtet amai, taoba Hokolbar aonung ya Paris yimti nung kiralongrartemi lendong agütsütsüba tesemtem rongnung tesem ka nung California nungi kentener telok ka anir aruagi ‘rock’ kentenba sentong ka nung nisung aika adenshia liasü, ano football asayadak Germany nungi anir arua parnok den football tasayadak nung nisung meyirijang 80 shi agi iba asayaji repranga lia iba anasa lendongji atalok. Item tesemtemji dang masü saka nisungtem anisüngzüka mener chiajemdak tesemtem nung kiralongrartemi kecha tapayu mali mashimashi injang yokba agi nisung taküm aika samatsüogo. Ibai Paris nung alirtem asoshi tasümang azüngba mapang lir, kechiyong yirua alirtem rongnunga ano kechi ataloktsüar memetet. Aji oda, ibai Paris asoshi mangyimba mapang lir. Iba mangyimba nung alima ajungai parnok den mangyim jashi lemsateper. Iba ama mangyimba mapang, Paris nung lendong agütsürtemji shirnok aser parnok tebilemba aser nükjidongji kechi liasü ta bushisüngdanga metettsübaji tarutsü lima kümzüka ayutsü asoshi kanga nüngdak asütsü. Tang tashi nung Paris nung lendong agütsürtem tenüng karbo metetadokogo aser ano kiralongrartemi bena liasüba Syria passport ka ngutetogo ta metetdaktsüogo. Iba jagi kiralongrartemji Syria nungi aruba purtem asütsü ta kuli ka sayur. Tetezüji, Paris nung lendong atalokbaji tang Syria nung sorkar anemer Islamic State (IS) telok anema France-i shilem agiba dak sendaktepa alitsü südi ta angatetter. Atangji, alima nung IS telok ama kiralongrar telok adokbaji alima asoshi kanga lendong lir. Iba telok yagi Syria yimli dang masü saka alima ajunga Islamic state akümtsü asoshi tongpang ayonger, anungji iba tongpang nung shilem agitsü purtemji alima tesem ajaklen peisasa mulungtetba nübo aika adoker. Iba tongpang ya tenzüker, joko India nunga talisa Northeast nung IS nung adentsü purtem aika adokogo ta angazüker. Iba ama telok ka anema raratsübaji alima yimjung asoshi raraba den kasa asütsü. Ajisüaka, France yimteni inyakba mapa reprangdangra, parnoki Syria tir Bashar al-Assad maginer, anungji Syria nung pa maginertem telok yaria aru aser par lima Syria opposition teloktem jenokdakja aru. Ibaji dang masü saka ano France lima ya joko Muslim nunger lima küma aotsüsa Muslim nunger ayangertem agi senso küma alir teimba küma odagi. Anungji, France lima nung Muslim nungertemji shitakba senso ka ama agizüka mamshi tashi parnoki timtem agütsütsü aser senso kümdaktsüra parnoki dang yimsü asütsüsa akümtsü ta asüba tia tamajung ka nung France lima iadokogo. Tang Syria lima nung atalokba timtem mapang yabo yakta süitemtsüa akok saka France limabo mesüngjemtettsü. Aji oda, yimteni tesem ka nung kari yarili aser kar anemli ta inyaktsü, idangji tai maketba nübortemsa akoksatsü.