Paris nung Middle East yimjung senden amentsü memulunger: Israel

Jerusalem, November 07 (Agencies): France yimtiba, Paris nung Middle East den sentakba yimjung senden amentsü asoshi benokba onük magizükba olen ka Israel-i tanü, Hombar nü metetdaktsüogo.
France kübok Paris nung taküm, 2016 küm tatemlen Middle East yimjung senden amentsü ayonga lir aser iba senden nung mensemtsü onük ka France-i benok.
Ajisüaka, bendang linük mensemba ajanga par linük aser Palestine na tsüngda senden amentsüren nem tetsükdaktsü bener arütsü ta shia, Israel-i iba onük magizüktsü lemtet.
Israel Ato Kilonser, Benjamin Netanyhu’er diplomatic advisor aser Israel’er acting national security advisor na den Israel kübok Jerusalem nung senden amendang par France linükia Paris yimjung senden nung mensemtsü jangraba olen ka France ambassador, Pierre Vimont-i benoka liasü.
“Taoba mapang, 2014 küm anena ayuba yimjung senden tanaben menshitsü atema Israel-i mejangrar. Palestine den adokba mangatettepbaren bentettsü atema Palestinian Authority aser Israel na tsüngda dang senden amentsü renema lir,” ta Israel’er lenirtemi metetdaktsü.
Vimont-i Israel’er telemtetba den sentakba osang kecha memetetdaktsüi lir saka par France linüki taküm küm tatemlen yimjung senden ka ayongtsü renemba osang ka France foreign ministry-i metetdaktsüogo.
United Nations (UN), European Union (EU), United States (US) aser tongti Arab linüktemi Israel aser Palestine lenir ka danga mejaoki par linük ana den sentakba senden ka taküm June ita amenba densema, Israel aser Palestine na tsüngda teti asoshi yimji yimjung lidaktsütsü nükjidong nung France-i tan ama, mapang shia yimjung senden ayongtsü merangba osang bushiteta lir.
Iba tangatetba tajung yur, Israel aser Palestine na tsüngda yimjung senden tanaben menshidaktsütsü nükjidong nung France linüki taküm küm tatemlen Paris nung yimjung sendenji ayonga lir.
US-i ayonger amenba tesüsaba Israel-Palestine yimjung senden tamakok nung 2014 küm April ita tembanga liasü.
Ano külen, Paris nung ayongba sendenji asangsang nung menra, par linüki iba senden nung shilem agitsü mulungba olen ka Palestine lenirtemi metetdaktsüogo.
Par yimjung senden nung alimai tongti shilem agiba ajanga Palestine Tir, Mahmoud Abbas aser pai aniba Palestine lenirtemi nokdakdak sabang angutsü ta temulung melemi bilema, Israel-i alimai ayongba yimjung senden nung shilem agitsü memulungi lir.
Ano külen, Israel-i ozüng alema inyaktsü tenzükba tashishitsü aketba tesem nung par nübur alitsü ki o jen renemba maparen manen tashibo par linük den yimjung senden amentsü memulungba olen ka Palestine-ia metetdakja lir.