Paris nung Ukraine yimjung tezüngzüktep akangshitsütsü senden amen

Paris kübok Elysee Palace kilung nung Ukraine den sentakba senden ka tanü Hokolbar nü amenba jakdang Russia Tir, Vladimir Putin; Germany Chancellor, Angela Merkel; France Tir, Francois Hollande aser Ukraine Tir, Petro Poroshenko nungeri arok noksa agitsü asoshi külemi nokdaka ataba yangi angur. (Paris, October 02)

 Paris, October 02 (Agencies): France, Germnay, Russia aser Ukraine lenirtemi Ukraine sorkar aser sorkar anemer na tsüngda agia aliba yimjung tezüngzüktep tali akangshitsütsü nükjidong nung Paris yimti nung tongti senden ka tanü Hokolbar nü menogo.

Ukraine nung sorkar mitkar aser sorkar anemer na tsüngda tongpang rarabaren tang kanga ajema kümogo saka Ukraine nung ita 18 tejaklen nungi tenzüka mangatettep adoka nisunga 8,000 dak tema tepsetbaren anenja par linük nung teti asoshi yimji yimjung tia likdaktsütsü asoshi yimtenren tebentetbaren bener arutsütsü onük tanü lenirtemi benoka jembiba osang jangjaogo.

Aji oda, Ukraine anüdoklen tentetba tesemtem nung election agitsü, Russia pusemertem aliba tesemi international tetendangertem aotsü meladaktsütsü aser tongpang raradak nungi tongpang nung amshitsü osettsüset tulu ajunga agientsü onüktema tanü lenirtemi benoka jembia liasü.

“Ukraine sorkar aser sorkar anemer na tsüngda taküm February ita Minsk nung agiba yimjung tezüngzüktep mapa küma inyakdaktsünür ajisüaka, parnoki tanü tashi nangzüktepba aika raksaogo,” ta Russia Tir, Vladimir Putin-i tanü senden nung lemsatep.

“Ukraine ken o tatemküma tanü tashi mebentetteti lir saka iba mangatettep ken o teti asoshi bentettettsü ta tamang akar,” ta pai ashi.

Ajisüaka, Russia-i par mitkar züngsem aser tongpang nung amshitsü osettsüset Syria-i yoka Syria sorkar anemer anema raradaktsütsü tenzükba ajanga Ukriane den sentakba ken o mebentettsüsa tensa bener arutsütsü akok ta international tensa tendangba mongintemi metetdaktsüogo.

Ano, Putin-i par mitkartem yoka Syria nung tongti shilem agitsü tenzükba ajanga par linüki Ukraine nungi Crimea peninsula tashiyim agi agiba ken o nung ajemdaker par linük anema benokba tenokdangba sentongtem agiendaktsütsü alizüng ayuba osang ka Ukraine sorkar lenirtemia tebilemtsü kaa metetdaktsüogo.

Ano külen, Syria nung tongpang kanga sashia raraba ajanga Europe nem bener arutsüba refugee nisungtem den sentakba khuret agi anentsü tenzükba yong Europe lenirtemia Russia den tanaben amalitepa inyaktsü lemtetba osanga jangjaogo.

Ajisüaka, Syria aser Ukraine na den sentakba ken o anaji loktepa mebenshitsü tajungshiba olen ka Merkel-i metetdaktsüogo.