Paris Saint-Germain puri Aubameyang atema Euro Million 70 agütsütsü renema lir

Berlin, May 4 (Agencies): Paris Saint-Germain puri Borussia Dortmund nungi striker Pierre-Emerick Aubameyang alitsü asoshi euro million 70 ($76.5 million) agütsütsü asoshi renema aliba Brehostibarnü osang ka ajanga metetdaktsü.
France nunger asayar yagi iba season nung goal 35 agüja lir. Pai PSG director of football Patrick Kluivert den Paris nung ajurutepogo.
German osang kaket ka ajanga ashiba agi, Aubameyang aser club na tangatettep kati arutsü asoshi ana nungdang lir.
May 27 nü Eintracht Frankfurt den German Cup final asayaba sülen Dortmund puri PSG nungi offer agütsüba angadangtsü asoshi atadar.
Arishi küm 27 tain Aubameyang-i PSG nung season shia euro million 14 tashi aatsü akok, ta osang ajanga metetdaktsü. France nunger asayar yagi Real Madrid nung mesüra Spanish league nung danga asayatsü asoshi jangraba lemsatepa liasü, saka par kibong Paris nung lir.
Pa Dortmund nung asayatsü asoshi kulizüngtepba ano küm asem anunga lir, saka iba season tatemi pa German club ya toktsütsü akok.
Taoba mapang Germany striker Lukas Podolski-i ashiba agi, iba telemtetba ya Aubameyang asoshi kanga tapet asütsü. “Pa France nungi lir aser pai French jembir aser par kibonga idakji lir, saka pai pa sasa Dortmund nung ama kasa asütsü masütsü ta asüngdangtsüla, kechiyong pa Borussia nungbo kanga nüngtugu lir saka Saint-Germain nung pa amala asayar tajung aika lir,” ta Podolski taoba hopta Bild atema column ka nung zülutsü.