Park aputsü ken o angadangogo:S. Korean

Seoul, March 30, 2017 : Tawa S Korea Tir menden nungi aludaktsür alila Park Geun-hye (abelen nungi tanabula), la aputsü temelelaba meshiba atema tasüngdangba asüngdangtsü asoshi Brihostibarnü Seoul Central District Court tonga aruba noksa nung angur.

Seoul, March 30 (Agencies) : Tanü Brihostibarnü taoba mapang S. Korea Tir Park Geun-hye aputsü tetuyuba agüja aliba ken o ka tembanga angadangogo. Iba ken o yasa mapang talangtiba agia jembi. Park Geun-hye ya tan ita tetenzüklen Tir menden nungi aludaktsü.
Security tebilemtsü kar aliba ajanga Park ji Seoul Central District okatsür office-i anüngdang toroto matongdang yongi anir ao. Iba office ya Seoul Central District Court anasa lir aser lai iba okadak la aputsü tetuyuba agüja aliba anema ken o ka benoka lir, ta osangbenertemi ashi.
Arishi küm 65 tain, Park-i teraksa adokdaktsüba bushisüngdangba nung tongti shilem agir Seoul okatsür office nungi special investigation headquarters-i, taoba mapang lenirji okadaki telemtetba agütsüba ataa iba office ki tatongtep 10buba nung aliba ‘temporary detention unit’ nung yua alitsü, ta ashi.
Park anema ken o aika benoka aliba ajanga Hokolbarnü ang telemtetba tem metetdaktsütsü.
Park-i temulung lemteta medemla, Choi Soon-sil, shiba tang pua lir, la Park-i nungita inyakbatem okatsürtemi jangjaogo. Park dak sübokrem mapa inyakba, Tir tashi tim mesüi amshiba, la tebilemba atongtsü asoshi tashiyim amshiba aser linük miim osang prokshiba taitem tonglokja lir.
La tashi samaba sülen taoba hopta-a okatsürtemi Park dang kanga sashia asüngdangya süa liasü.
La March 10, 2017 nü Tir mapa nungi teti atema anentsüba sülen tan hopta tetenzüklen linük asoshi okatsürtemi la pua ayutsü temeleba meshia liasü.
La aputsü temelaba agütsü nungbo, South Korea nung Tir inyaka alir tepuokdak ayur rongnung la tasembula asütsü.