Park Geun-hye merenshitsü asoshi North Korea-i akhanger

Seoul, June 29 (Agencies): Taoba South Korea tir, Park Geun-hye aser lai aniba sorkar nung itangiter tekolakba nati North Korea lenir tepsettsü tasa yangluba asoshi temerenshi agütsütsü atema tena North Korea nem agütsütsü metetdaktsüogo, ta North Korea ajanga ashi.
Brehostibarnü temai adokba osang ajanga Park-i North Korea indang lenir, Kim Jong-un tepsettsü asoshi 2015 küm tasa yanglu, anungji ashikülaker Park Geun-hye aser la indang itangiter tekolakba, Byung-ho na nem tasüba temerenshi agütsür, ta North Korea indang Korean Central News Agency (KCNA) ajanga ashi.
Iba osang temai adokba indang ya KCNA ajanga kicha mashi saka North Korea lenir, Kim Jong-un yimli raksatsütsü asoshi 2015 küm Park-i sentong renem, ta tain hopta tetenzüklen Japan indang osang kaket ka ajanga ashi.
Park ya senotsü meshidaki amshiba ken o ajanga March ita la menden nungi aludaktsü aser tang South Korea nung la indang ken o jembiba mapang lir.
North Korea-i South Korea lisobur nem iba ama amokmeren agütsüba ya taidok agütsüla masü aser Kim Jong-un tepsettsü tasa yangluba osang ya tejangja masü, ta South Korea indang National Intelligence Agency (NIS) ajanga ashi.
“DPRK indang supreme leader tepsettsü sentong yangluba asoshi ashi külaker Park Geun-hye aser intelligence service indang ex-director na atema linük nung aser bendang lima nunga tasüba temerenshi agütsütsü asoshi onoki sangdonger,” ta KCNA ajanga ashi.
“Tarutsü nunga US aser South Korea longjemer ozü lenir tepsettsü tasalendong yangluba metetra jelia osang kicha magütsür merenshitsü,” ta North Korea sorkar indang KCNA ajanga-sa shisem.
Iba sangdong ya North Korea indang Ministry of State Security, Ministry of People’s Security aser Central Public Prosecutors Office longjemer agütsü, ta KCNA-i ashi.
Biochemical weapon amshia US Central Intelligence Agency aser South Korea indang itangiterba teloki Kim Jong-un tepsettsü tasa yanglu, ta North Korea-i May ita aitsü.
Aser iba mapang nunga taoba NIS tekolakba Lee ya North Korea-i meshi.
South Korea indang taoba tir, Park ya dang obendangdak la anema ken o bushisüngdangba mapang lir. La anema South Korea nung ken o 18 benoka lir aser la aitsüra taküm piyong tepuokdak ayutsü.