Park Geun-hye ya linük ashioktsür ka lir: North Korea

Seoul, Rongchii 07 (Agencies) : Taoba South Korea Tir, Park Geun-hye ya linük ashioktsür ka liasü aser lai sen aika jenjang ochimashi maparen inyakba miimbanga liasü, ta tanü Küptoknü North Korea-i metetdaktsüogo. Ochimashiba maparen nung Park küm metsür pezü tepuokdak ayuatsü obendang agütsüba nung North Korea-i tang mezüngbuba ola adoka iba osang metetdaktsür.
Yimten tashi amshia company-tem nungi sen million aika sübokrem agiba amala densema ken o balala nung ajemdaker Seoul Central District Court-i Park aija la nem temerenshi agütsüba sülen anogo ka dang lir North pur official Korean Central News Agency ajanga iba osang sangdong. Park ya taoba küm March ita nungi pua lir.
Park-i yimsü asüba mapang Korea linük ana tsüngda tesendaktep kanga mejungi liasü kechiaser North Korea-i 2016 küm tongpang nung amshiba nuclear oset aser missile tendangba sülen lai parnok anema kanga sashia nokdak.
Küm aika North Korea nunger osangtem nung Park aija o tetsürok shia la tenüng menüktsütsü merang; United States atema pei mang ayokba tetsür ta densema la nem jaloktsü aser ‘ajungbena dang taküm samatsütsü’ temsüa aliba nisung tamajung ta densema shia Park tiluja liasü.
North Korea nunger tematiba lenir tepsettsü asalentong yanglur ta aija, taoba küm June ita nung Park aser lar itdangiter tekolakba tena tepsettsü ta North Korea-i azüngashia metetdaktsü. Aji oda süaka South pur National Intelligence Service-i ibajibo masüa ta jangjashitsüogo.
Aji oda süaka, Park pusemertema ano lir aser parnokji teimba taintem, arishi küm 50s, 60s & 70s purtem lir; parnoki la chiokdaktsütsü atema taoba küm songtema sentong balala ayongzüka liasü.
Tanü Honibarnü Seoul yimti nung Tir aliba ki anasa Park nungitertem meyirijang aika adenshia parnok jashia liaka tesünep nung dang lokti sentong ka ayongzüka South Korea aser US wako ayipzüa court aija tetsüng agi jajaogo.