Park-i S Korea PM tasen atema tenüng benoker

Seoul, November 02 (Agencies): South Korea Tir, Park Geun-hye-i Ato Kilonser aser tongti yimsüsür 2 tashi melenzüktsü atema tanü, Bodbar nü tenüng benokogo.
Ajisüaka, Park anema benokba lai lar tembar nem maongka balaka agüja, tajangzük ngudaktsüba ken o tezülen yutsütsü nükjidong nung Park-i tan yimsüsür melenzüktsü tenüng benoker ta shia, Park-i tenzükba mapatong nokdangtsü renemba olen ka la anemertemi metetdaktsüogo.
“Kim Byong-joon ya S Korea-i tang ajurua aliba makmakshimak aser terataba tia agientsütettsü tetemsü lenir ka lir aser pa lenisüba kübok S Korea linük jenjang kanga agi tajungba akümtsü,” ta shia, par Ato Kilonser tasenba kümdaktsütsü atema Park-i Kookmin University nung professor, Kim tenüng benok.
Ano, par Finance Minister & Deputy Prime Minister atema S Korea’er Financial Services Commission mendenbuba, Yim Jong-yong aser par Public Safety & Security Ministry lenisang menden atema Park Seung-joo na tenüng Park-i benokba osang jangjaogo.
Kim aser Park ya na taoba S Korea lenisang, Roh Moo-hyun lenisüba kübok tenzükba yimsüsürtem lir aser Park-i la anemertem peladakja, la anembaren anendaktsütsü nükjidong nung tan tena tenüngji benoker lir.
“Park-i parliament den tongtepratep kecha mesüi tan yimsüsür tasen shimtsü mapatong tenzüka lir. Lai tan yimsüsür tasen shima, cabinet atsüshir ama sayur saka iba ya la anema benokba ken o tezülen yutsütsü atema inyakba tasa ka dang lir,” ta Park anema nokdaker, Democratic Party lenir, Woo Sang-ho-i metetdaktsü.
Opposition teloki Kim Ato Kilonser tasenba akümtsü den sentakba ken o angadangba sentong nung shilem magi pa Ato Kilonser tasenba shimtsü mapatong nokdangtsü sentong renemba osang ka Yonhap News Agency-ia metetdaktsüogo.
Ano külen, Park tembar, Choi Soon-sil-ia prosecutor office nung la anema benokba tajangzük balaka agiba ken o angadangba sentong nung tanü agi tasemnü buba tashi adenba osang angazükogo.
Choi-i sorkar lenisütsü menden kecha bena meliaka, lai Park nungi maongka balaka ngua, dollar sen million 68 shi rongsen tajangzükba anguba osang bushiteta lir.