Park-i S Korea Tir menden toktsütsü mulungba osang sangoktsü

Seoul, November 29 (Agencies): South Korea Tir, Park Geun-hye-i linük lenisütsü menden toktsütsü mulungba olen ka tanü, Mongolbar nü sangoktsüogo.
Parliament-i Tir menden abentsü kümsük abensaba jakdang yimsütsü menden toktsütsü lenmang la nem lapoktsüra, lai Tir menden nungi anentsü renemba olen ka Park-i tanü metetdaktsü.
La anema benokba ochimashi inyakba ken o nung ajemdaker, la tashiyim agi Tir menden nungi anendaktsütsü maparen paidoktsü nükjidong nung Park-i tan telemtetbaji agir lir.
Ajisüaka, “Park-i la tashiyim agi yimsüsütsü menden nungi anentsüba paidoktsü nükjidong nung benokba tasa magizüker,” ta shia, opposition telok tulutiba, Minjoo Party yimtenren teloki sentong renemba ama, tan Hokolbar mesüra taruba Hokolbar nü Park Tir menden nungi tashiyim agi anendaktsütsü sentong agitsü renemba osang ka metetdaktsüogo.
“Ni Tir abentsü kümsük tembangba jakdang yimsüsütsü menden toktsütsü khuretji S Korea’er National Assembly nem nungloktsür,” ta Park-i tanü lar nüburtem dang sangoktsü.
“Opposition aser yimsüsü tashi benoka alir yimsüsürtemi asen linük nung adokba yimtenren makmakshimak tensa agienja, tetsükdaktsü kecha meli, sorkar melenteptsü mapatong inyaktsü nangzükra, ni ozüngi melaba ama, Tir menden toktsütsü mulunga lir,” ta lai nenshia ashi.
S Korea linüki tang ajurushia aliba yimtenren makmakshimak tensaji koma bentettsü iba osang tang tashi mejangjatet lir saka Park-i tanü yimsüsütsü menden toktsütsü mulungba osang sangokja aka, lai asangsang nungbo Tir menden toktsütsü bilemba maliba osang angazükogo.
La anemer nisung meyirijang jenti tesüsa, taoba Honibar nü Seoul yimtiba nung Park-i Tir menden toktsütsü takhangba benoka, longkak kanga sashia aitba den, nübur aser opposition teloktemi aroki lungjemer la tashiyim agi Tir menden nungi anentsütsü mapatong tenzüktsü renemba mapang ka nung Park-i yimsüsütsü menden toktsütsü mulungba olenji sangoktsür lir.
Ano külen, la anema benokba ken o nung lai aibelena maliba olen ka Park-i tekong meranga metetdaktsüogo.