Park Won-soon-i Tir election nung shilem magitsü lemtetogo

Seoul, January 26 (Agencies) : South Korea Tir asütsü atema tetemsü candidate ka ta züngshia aliba, Seoul nung Mayor Park Won-soon-i pa iba election nung shilem magitsü lemtetogo, ta Brihostibarnü metetdaktsü.
“Ni iba election nung metoktepaka, Democratic Party nung züngsem ka ama ni nüburtem taginüba ama sorkar melentsü asoshi bendanga agüja inyaktsü,” ta Park-i sangdong ka ajanga metetdaktsütsü.
“Ni nüburtem dak rangloker inyaktsü. Seoul nung mayor ka ama, nüburtem kümzüka aser pela lidaktsütsü asoshi ni iba yimti ya alima nung yimti tajungtiba ka kümdaktsütsü sentong lir,” ta Park-i shisem.
Park atema inyakertemi ashiba agi, pa nungiter ishika tang asüba agi pai iba telemtetba agi.
Taoba hopta RealMeter-i asadangba mapang Park nungitertem noklang nung shilem 3.4 ang ngutet aser ibaji tanga candidate tem dang nungi kanga agi tajemba lir.
Iba asadangba nung tesüiba mapang opposition nungi tekolakba, Moon Jae-in-i noklang nung shilem 29.1 aser kasa party nungi Seongnam nung Mayor Lee Jae-myun-i shilem 10.2 nguteta lir.
Linük atema Tir election ya December ita nung agitsü sentong lir.