Parl. Panel-i Delhi police dang tashiyim mamshitsü tuyu

New Delhi, Aenjeti/January 13 (Agencies): Tawa Delhi police-i longkak aiter kaketshirtem anema tashi tali amshiba atema Hombarnü Parliamentary panel kati Delhi Police ketdangsertem dang tasüngdangba kaogo.
Parliamentary Panel-i Delhi police dang kaketshirtem aser lanurtem madak ambangyima tashi mamshitsü tuyu.
Panel-isa Delhi police dang linük yimtiba nung tawa-tanü tenokdangbatem kanga agütsüba atema tasüngdangba kaa, item ama tenokdangba ajanga nüburtemi timtem kanga ajurur, ta ashi.
Parliamentary standing committee on home affairs nung Chairman aser Congress lenir, Anand Sharma-i Delhi Police dang, “Kodang longkak aitba nenoki metetdir nenoki Section 144 benoker aser ajok amshir. Tanurtemji (kaketshirtemji) nisung tamajungertem ama mezüngshitsüla. Lanurtemji nenok chirtem ama züngshitsüla,” ta ashi.
Hombarbnü Union Home Ministry nungi tongti ketdangsertem aser Delhi Police tongti, Amulya Patnaik nungeri Parliamentary Standing Committee on Home Affairs ajurua tawa Delhi aser National Capital Region (NCR) nung ozüng alema benshiba mapatem kanga bulua akümba atema osang metetdakja o lemtep.
Tawa Jawaharlal Nehru University (JNU) aser Jamia Millia Islamia nung mepetmesü adokba tatalokbatem dak sendakba nung Parliamentary Panel nung züngsemtemi, Delhi police-i longkak aiter kaketshirtem dak tashi tali alia amshiba aser mapang shia Delhi nung Section 144 ozüng benokba ashishi tasüngdangba kaogo.
Tawa Jamia University nung mepetmesü adokdang police-i kaketshirtem aika yiruja liasü.
Iba dak alia nisung tamajunger telok kati JNU campus amakdang Delhi police-i JNU kikümbang nung nokdaker kecha meinyak, ta police nem tai tonglokja lir.
Delhi Police Commissioner, DGP Haryana Manoj Yadav den Uttar Pradesh Police aser Rajasthan police ketdangsertemia parnok litsü kübok aliba NCR nung ozüng alema inyakba mapatem osang metetdakja liasü.