Parl. Secretary-i I&FC Zunheboto semdang

Dimapur, November 18 (TYO) : Irrigation & Flood Control (I&FC) Parliamentary Secretary, N. Jacob Zhimomi-i November 17, 2016 nü I&FC office, Zunheboto semdang aser idakji aliba staff tem sen ajurutepa sensaksem mapang liasü.
Iba mapang Parliamentary Secretary-i staff tem dang nendaka inyaktsü aser ochishia public tenzüktsü atema tayongzükba agütsü.
Pai Union Minister, Water Resources, Uma Bharti den Nagaland atema senotsü aser tanga mapatongtem atema tongtepratepdar ta paisa osang lemsatep.
Ministry of Water Resources, Government of India-i inyakyim tasen ka tenzükogo aser ibaji Agri aser Allied department tem den sendaktepa inyaktsü indang lir. Iba inyakyim ya Community oriented projects asütsü aser iba ajanga tajangzük tulu angutsü, ta Jacob-isa metetdaktsü.
Zunheboto district nung ayong tajung aika lir aser iba jagi agri & allied sectors dak sendakba tongtipang irrigation project tem inyaktsü, ta paisa shisem.
NITI Aayog kübok CSS nung Chief Minister, T.R. Zeliang züngsem lir aser pa lenisüba kübok State sorkari tilatiba jenjang nung mapatong aika inyaktsü sentong ataonga lir. Item mapatong ya nübortemi pela agizüktsüla aser pusema nungittsüla, ta paisa ashi.
Parliamentary Secretary-i Zunheboto district semdangba atema Executive Engineer, I & FC, Zunheboto, Er. Huska Yeptho-i pa dang pelaba metetdaktsü aser staff quarters yanglutsü atema tezüluba ka agütsü.
Iba mapang Vice President, Sumi Hoho, Khehoshe Yepthomi, DSO, Lhokiye, aser tanga ketdangsertemi Parliamentary Secretary, N. Jacob Zhimomi meina aru.