Parl. Secy. Tovihoto-i DMC ajanga yangluba lenmang lapoktsü

Dimapur, November 6 (TYO): Dimapur Municipal Council (DMC)-i terenlok mapa balala inyaka aruba nung shilem ka tembanga inyakogo aser ibaji United North Block B, Burma camp nung gari lenmang yangluba lir.
Hombar nü Flood Control & Irrigation Parliamentary secretary, Tovihoto Aye-i iba lenmang lapoktsü.
DMC-i tang tashi nung gari lenmangtem yanglua aruba rongnung iba lenmang ya talangtiba lir. Gari lenmang tasazükji 2466 sq metre lir aser ita 6 tsüngda sen lakh 25.53 endoka yanglu.
Tanü lenmang lapokba sentong nung jembidang DMC Administrator, Moa Sangtam-i taoba DMC Administrator aser tang Project Director, DRDA teinyakdak, Atokhe Aye nem tenüngsang agütsü.
Iba mapa ya Atokhe ketdangsüba mapang tenzükba liasü, ta Moa-isa shisem.
DMC Administrator-isa kiyong nung alirtemi DMC den yaritepa mapa takok ngua inyaktetba asoshi pelaba metetdaktsü.
Terenlok mapa ya odang meinyakteter saka iba ya kiyong nung mangdang aketba lennirtemi inyakba ajanga lir, ta Tovihoto Aye-ia o jembidang ashi.
Telongjem alidak tashi lir anungji iba kiyong nung alirtemi telongjem nung alitsü ayongzüker, ta Tovihoto-isa shisem.
Iba sentong nung Project Director, DRDA, Atokhe Aye-ia o jembi.