Parl. Secys. atema SC tetuyuba NE state temi ano meinyak

Guwahati, August 23 (Agencies): 2004 küm Assam legislation ka ajanga Parliamentary Secretary tem shimtsü melaba legislation ji temzüng alema lir, ta taküm July ita nung Supreme Court-i obendang ka agüja liasü, ajisüaka Northeast nung state kati danga iba tetuyuba meinyak.
Nagaland, Arunachal, Manipur, Mizoram aser Meghalaya nung parliamentary secretary tem shima lir, aser tang tashibo parnoki SC obendang agütsüba ama meinyak.
Nagaland aser Arunachal Angh, PB Acharya-i, “Iba obendang atema tang tashi nungbo ano ni meshisadang,” ta ashi.
Party ka meloksai alitsü atema parliamentary secretary tem shimer, ta shia Acharya-i, lokti tentet mesüra nija kari pa nem tezüluba nung ken o agütsü nung ang pai SC tetuyuba nung ajemdaker inyaktsü, ta metetdaktsü.
“Tribal tentet kati temepishiba ka agütsü, aser ibaji osangkakettem ajanga kü dang ashiba liasü. Ajisüaka tang tashi nungbo ni tezüluba nung kecha mangu. Ni tezüluba shidi mengura ni iba atemaji meinyaktettsü. Ni iba atemaji meshisadang,” ta paisa metetdaktsü.
“Northeast state tem indang tangatetbaji ni memetet. Supreme Court-i obendang agütsüogo, aser tangbo ibaji ozüng ka kümogo. Ajisüaka asen state nung ibaji apet asü mapetar ni memetet,” ta tawa Acharya-i osangbener dang ashi.
Nagaland Tribes’ Council (NTC)-i osangkaket ajanga temepishiba agütsüba nung ajemdaker Angh-i item o ya jembi. NTC-i state nung parliamentary secretaries 26 aser advisors 9 agientsü atema akhangbaji osangkakettem nung adok, iba den külemi NTC-i ashiba agi, August 18, 2017 nü parnoki temepishiba ka Angh tenüng zülur chief secretary office dangi yokogo.
Ano külen Nagaland nung opposition Congress-ia, taoba hopta parnoki parliamentary secretaries aser advisors agientsü atema takhangba agüja Angh nem shidi ka agütsüogo, ta metetdaktsü.
Nagaland Congress tongti, K Therie-i, “Onok Raj Bhavan-i aodang Angh Arunachal nung liasü. Anungji onoki Supreme Court obendang den onoki züluba shidiji pa indang secretary nem agütsü. Ajisüaka tangbo pai iba shidi mangu ta ashir, onoki anogo ka ana tsüngda nenshia pa nem shidi ka agütsütsü aser pai kechi inyakdir repranga atatsü,” ta metetdaktsü.