Parliament amakba lendong nung asürtem bilemteta akhüm agütsü

New Delhi, December 13 (Agencies): Deobar nü Ato kilonser Narendra Modi aser MP temi 2001 küm Parliament amakba lendong nung taküm tenla agüja asürtem bilemteta akhüm agütsüogo.
Modi den Lok Sabha Speaker Sumitra Mahajan, Congress Party Tir Sonia Gandhi, taoba Ato kilonser Manmohan Singh, BJP lenir tain L K Advani, Minority Affairs Minister Najma Heptulla, aser Rajya Sabha Deputy Chairman, P J Kurien nungeri naro tokja asürtem nem akhüm agütsü.
2001 küm December 13 nü kiralongrar pongu Parliament telungteti ia injang sashia kahloktsüdang nisung teku kahset. Iba tatalokba sülen tanü küm 14 ajunger.
Ato kilonser Modi-isa asürtem kinüngera kar ajurua liasü. Ano MP temia asürtem nem akhüm agütsüba temaitsü khenpiga mokrema liasü.
Iba lendong nung asürtem rongnung Delhi Police pongu aser Central Reserve Police Force (CRPF) ketdangser tetsür ka densema liasü.
“2001 küm iba anogo nung democracy kümzüka ayudang taküm samar tasütait nisungtem onoki bilemteter,” ta Modi-i twitter ajanga ashi.