Parliament-i Ato Kilonser tasenba shimtsü mulunger: Park

Seoul, November 08 (Agencies): Mepetmesü tia ajurua aliba South Korea Tir, Park Geun-hye-i par parliament nem Ato Kilonser tasenba shimtsü temeten agütsütsü mulungba olen ka tanü, Mongolbar nü metetdaktsüogo.
Park-i opposition teloki amokbangba National Assembly Speaker, Chung Sye-kyun den ajurutepa senden amenba sülen parliament nem Ato Kilonser tasenba shimdaktsütsü renemba osangji sangoktsü.
Lai mezüngbo Ato Kilonser tasenba shimtsü atema yimsüsür tenüng benoka liasü saka lar yimtenren jenjang tajungba kümdaktsütsü nükjidong nung Park-i lar inyakyim melenshia, tan parliament nem Ato Kilonser tasenba shimtsü melatsü lemtetshir lir.
Parliament nem Ato Kilonser tasenba shimtsü melatsü mulungba den külemi, Ato Kilonser tasenba nem cabinet lenitsü tashia agütsütsü mulungba olen ka Park-i sangoktsüogo.
Park-i Ato Kilonser tasenba inyakdaktsütsü atema Kim Byong-joon tenüng tawa benok saka opposition yimsüsürtemi Kim Ato Kilonser shimtsü atema onük angadangtsü sentonga magitsü lemteta, Park anemtsü tenzük.
Park-i lar tembar, Choi Soon-sil nem maongka balaka agüja, dollar sen million 3 shi tajangzük ngudaktsüba ken o nung ajemdaker la anema ozüng alema inyakba ken o benoka, la Tir menden nungi anentsü takhangba benoka lir.