Parliament-i Groysman Ukraine PM tasenba inyaktsü shimer

Kiev, April 14 (Agencies): Ukraine parliament-i Ukriane Ato Kilonser tasenba inyaktsü asoshi Volodymyr Groysman tanü Brehostibar nü shimogo.
Taoba Ato Kilonser, Arseniy Yatsenyuk-i yimsüsütsü menden toktsütsü asoshi benokba onük agizüka, parliament yimsüsürtemi tanü par vote agüja Groysman shima liasü.
Yatsenyuk melenzüka Ukraine Ato Kilonser tasenba inyakdaktsütsü nükjidong nung Ukraine Tir, Petro Poroshenko-i Groysman tenüng benokba osanga jangjaogo.
Groysman-i Ato Kilonser akümba jakdang Ukraine parliament speaker menden bena liasü.
Ukraine nung adokba yimtenren mangatettepbaren bentettsütsü nükjidong nung arishi küm 41 tain, Yatsenyuk-i Ato Kilonser menden toktsütsü lemtetba osang taoba Honibar nü sangokja liasü.
Pai yimsüsütsü menden toktsüba ajanga Ukraine-i yimtenren temelenshi agia par Ukraine linük European Union (EU) aser North Atlantic Treaty Organization (NATO) nung züngsemtsüren nung tejakleni mera agitsü lenmang sadema lapoker lir.
Taküm February ita agiba temulung malemba ken o nung Yatsenyuk-i aniba Cabinet-i temeten ngua liasü saka Yatsenyuk-i aniba teloktep Ukraine sorkar nung densemer yimtenren telok 2 tashi teloktep sorkar toktsüba yong Yatsenyuk jenjang mejungi akümtsüsa tia tamajung ajuru.
Yatsenyuk lenisüba kübok par Ukraine nung nungdakba temelenshi junga magiba aser par linük indang rongsenren jenjanga mejungi akümba osang bushiteta lir.
Ajisüaka, tan Groysman Ato Kilonser tasenba shimba ajanga Ukraine indang yimsütsü tashi ajunga Tir Poroshenko aser pa pusemertemi kijai abentsü maongka angutsü ta Ukraine’er yimtenren jenjang tendanger mongitemi metetdaktsüogo.
Ano külen, parliament yimsüsürtemi Groysman aser pai aniba sorkar tasenba magizük ka asübo, Ukraine-i election agitsü mapang atongba jakdang anojungi election agia yimsüsür aser Tir-a tasen shimtsüsa jenjang ajurutsü liasü.