Parliament mekatetra linük nüburtem timtemer: PM Modi

New Delhi, March 03 (Agencies): Brihostibarnü Ato kilonser, Narendra Modi-i, Parliament junga mekatetra linük nüburtem timtemer, ta ashi.

Tanü nikongdang Lok Sabha senden nung jembidang Modi-i, “House ya o tokteptsü tesem ka lir. Kodang Parliament senden junga mekatetlir linük timtemer aser talisa MP tem timtemer, kechiyong parnoki onüktem benoka mejembiteter,” ta ashi.

Parliament ya onük balala nung sorkar dang asüngdanga parnok tebilemba angatettsü sabang ka lir, ta Ato kilonseri Modi-i ashi.

Yashi Congress tatong Tir, Rahul Gandhi-i Parliament nung Modi aitsüba sülen tanü Modi-ia Rahul aija, nisung karbo arishi küm nung tain kümaka mangazüker, ta ashi.

“Nisung karbo tain akümdang angazüker, saka karibo mangazüker,” ta Modi-i ashi.

Maneni Rahul tenüng metetshii Modi-i, Congress leniri 2013 küm osangbenertem lia taoba sorkar indang ordinance ka shisaba indang aitsü.

Iba tatalokba mapang taoba Ato kilonser Manmohan Singh US nung liasü aser ibaji ajanga party jashidaktsü, ta pai ashi.

“Ato kilonser Manmohan Singh Obama (US Tir Barack) ajurutsü atema US-i oa aliba mapang ordinance ji shisa. Yimlibilema taintem akhümtsübuang,” ta Modi-i ashi.

Modi-i ashiba agi, Congress Party-i küm 60 yimsüsüba mapang meinyaktetba par sorkari küm ana majungdang inyaktetba ajanga Congress-i tenük merema pai aitsür.

“Onoki tajungba inyakba ajanga parnok (Congress) shisabulur,” ta pai ashi.

Ajisüaka pai Hindi oshi nung onük ghonda ka shi jembiba tatembanglen pai, “Asenok külemi longjemer linük atema langka inyaktsüdi. Nibo tasen, saka nenokbo tejen aser aika ajangshia lir. Arung asenok senteper linük atema langka inyaktsüdi,” ta ashi.