Parliament mekatetra Sonia khuret asütsü: BJP

New Delhi, August 02 (Agencies): Parliament senden magitetdaktsüba atema Congress Party ji raramatar aser tsübur ta aija tanü BJP-i, tan mongpu Parliament senden makatetra iba kuliji Sonia Gandhi (Congress Tir) khuret asütsü, ta shiogo.
Congress-i lungkak aitba onüktem nung o atsüteptsü atema sorkari mulunga lir ta shia BJP lenir Nirmala Sitharaman-i, party (Congress) dak opposition party tongti tangatetba mali aser India nüburtem takoksa ngudaktsür, ta aitsü.
“Congress tangatetbaji melenshipet melenshir. Parnok kanga ratamatar aser o atsütepba ajakji Parliament kima dang kanür,” ta lai ashi.
“O atsüteptsü asoshi kodang benokdir parnoki jena aor…. (aser) takhangba tasen bener arur,” ta laisa shisem.
Minister of state for Commerce & Industry Sitharaman-i, “Taoba senden nung Lok Sabha nung shilem 123 takok nguogo aser Rajya Sabha nunga shilem 100 dak tema takok nguogo. Congress-i iba ya tsübur. Parnoki Parlaiment nung sorkar nem takok mengudaktsüner,” ta ashi.
“Iba senden ya makatetra, Sonia Gandhi-i khuret abentsü,” ta lai ashi.
Opposition-i onük kar nung Ato kilonser (Modi) nem jembidaktsünüra parnoki o atsüteptsü benoktsüla, Ato kilonseri o aittsüa akok, ta BJP lenirisa ashi.
“Tesüiba küm ka nung Ato kilonseri tongtibang onüktem nung ponguben jembiogo. Tongtibang onüktem nung o atsütepba mapang pai o aitogo,” ta laisa ashi.
Tan Parliament senden July 21 nü tenzük, saka tang tashi nung senden junga magiteti arudagi. Tan mongpu senden ya August 13 nü tembangtsü.