Parliament nung Irani aser Mayawati na o langtep; Rajya Sabha senden asemben thinen

Parliament nung Irani aser Mayawati na o langtep; Rajya Sabha senden asemben thinen

February 24,2016: Bodhbarnü New Delhi, Parliament House kima Left party temi Jawaharlal Nehru University (JNU) ken o aser Dalit nunger kaketshir, Rohith Vemula soseta asüba ken o nung lungkak aita sorkar anema yimyim ayimba noksa nung angur.  

New Delhi, February 24 (Agencies): Bodhbarnü Rajya Sabha senden nung HRD Union minister, Smriti Irani aser BSP tongti, Mayawati na o kanga sashia langtepogo.
Tanü 11:00 ako süili Bahujan Samaj Party (BSP) tongti, Mayawati-i taoba ita Dalit nunger PhD shisashir, Rohith Vemula soseta asüba onük süoka mapang talangka jembi.
Deputy Rajya Sabha chairman, PJ Kurien-i la dang iba onükji nikongdang 2:00 ako nung ano jembiang anungji tang atemabo anenang ta mepishiaka la maneni jembia liasü.
Mayawati-i, “Centre nung BJP sorkar tashii aruba mapang nungi RSS tesayubatem benoktsü atema sentong tamajung benoker,” ta ashi.
Laisa, Hyderabad University, Aligarh Muslim University, Jamia Milia aser Jawaharlal Nehru University (JNU) ama akhümket rejutem nung item sentong tamajung jagi jangjonger, ta ashi.
Iba mapang nung senden nungji “Iba sorkar ya Ambedkar anemba sorkar”, “Dalit nunger anemba sorkar,” ta opposition züngsemtemi yimyim ayima liasü.
BSP tongti Mayawati-i, Rohith soseta asüba ken o dak sentakba union minister tem aser Vice chancellor anenjang iba den külemi iba ken o bushisüngdangba luden nung Dalit züngsem ka anioktsüla ta lai akhangba nung sorkar nungi telangzüba ka aginüa liasü.
“House nem iba onük lemtepdakjang. Opposition-i asüngdangnüba ajak langzütsü onoki melunga lir. O lemtep tangsa tenzüktsü melang. Ajisüaka o lemtep junga makai onoki MP kati (Mayawati) asüngdangba melangzütsü,” ta BJP MP, Mukhtar Abbas Naqvi-i langzü.
Iba sülen CPI(M) tongti, Sitaram Yechury-i, Mayawati aginüba telangzübaji sorkari tangsa agütsütsüla, kechiyong iba ya ‘khen dang asüngdangba’ tasüngdangba ka lir, ta ashi.
BSP-isa, Rohith soseta asüba ken o bushisüngdangba luden nungji dalit nunger züngsem ka malitsü asü (?) ta asüngdang. Iba mapang tashi nungjibo HRD minister, Smriti Irani kanga jashiatok.
Irani-i, “Iba House nung senior züngsemtem dang ni asüngdangnüba kaji, iba kin nungi obendanger kati ochi obendang agütsütettsü asü asü masü (?) Iba telemtetbaji pa nem agidaktsütsü asü (?)” ta asüngdang.
Ibaji langzüa Mayawati-i, “Parnok tebilembaji temerük masü. Ato kilonser tebilembaji temerük masü,” ta ashi.
Irani-isa, “Parnok yimtenren indang shilem agitsü atema shibai tanur ka amshir (?) Iba ya House kija nung masü saka linük tesem ajungalen parnoki benshir,” ta arrloktsü.
Minister-isa, “Rohith soseta asüba ya tang mezüng ken o ka masü, taoba mapang nunga Dalit kaketshir aika soseta süogo, Centre nung Congress-i aniba UPA yimsüsüba mapang nunga süogo,” ta ashi.
Item mapang ajak nungji senden nung BSP aser tanga opposition züngsemtemi maneni yimyim ayimba yong chairman Hamid Ansari-i, “Nenoki mapang peria agiogo. Yimlibilema menang. Nenok temang meima anepalutsüla,” ta ashi. Ajisüaka züngsemtemi maneni yimyiym ayimba ajanga Ansari-i senden minute 10 thinen.
Vemula soseta asüba ken o nung Rajya Sabha senden mezüng anogo nung opposition-i sorkar anema yimyim maneni ayimba ajanga senden asemben tashi thinena liasü.
Ano tanga osang ka nung Delhi nung osangbenertem den jembidang Congress tatong Tir, Rahul Gandhi-i, “O lemteptsü melunga lir ta sorkari shiogo. Ajisüaka parnoki Parliament nung jembitsü kü dang memelar. Ni jembitsü, saka ni kechi jembidir ta parnoki tsübur,” ta ashi.
Yashi Rahul-i, linük tesem ajaklen Modi sorkar aser RSS-i college aser university kaketshirtem ola nembangtsür ta aija liasü.

You must be logged in to post a comment Login