Parliament nung JNU ken o jembitsü

New Delhi, Feb. 20 (Agencies): Honibarnü party ajak nungi Rajya Sabha lenirtem senden amenba mapang taruba budget senden nung JNU ken o lemteptsü opposition-i akhangba ama Ato kilonser, Narendra Modi’er sorkari iba ken o lemteptsü mulunga agizük.
Budget senden February 23 nungi tenzüktsü lia tanü Rajya Sabha mendenbuba, Hamid Ansari leniba nung party ajak senden menogo. Iba senden nung Ato kilonser Modi-a dena liasü.
Senden tembangba sülen sorkar osang ka ajanga, “Onoki JNU ken o jembitsü mulunga lir. Parliament nung iba onük nung o toktepbaji linük nübur ajak nem angadaktsüner,” ta ashi.
Opposition lenirtemi Modi’er sorkar dang Parliament nung JNU mangatettep ken o aser Hyderabad University nung Dalit nunger kaketshir, Rohith Vemula soseta asüba ken o lemteptsü takhangba agüja liasü.
Tanü iba senden nungsa Bangladeshi enclaves nungi India-i arurtem nem West Bengal nung vote temeten agütsütsü atema Rajya Sabha nung o lemtep melii agizüktsü atema Modi’er sorkar aser opposition napronglai mulungtepogo.
Rajya Sabha nung taoba tzüngluruwa mongpu aser asükwa mongpu senden naprong nung rongrong adokba ajanga sorkari benokba tongtibang bill aika magizükteti liasü.