Parliament nung Lokpal Act amendment bill agizükogo

New Delhi, July 29 (Agencies): Lokpal and Lokayukta Act, 2013 ozüng yanglushitsü atema benokba bill ka Brihostibarnü Parliament nung agizükogo, koba ajanga sorkar mapa inyakertemi pei rongsen aser kiojen sangdongtsü atema küm shia July 31 anogo latetja aliba agiener.
NGOs mesüra tajangzük mebushiba tentettem shirnoki sorkar senpong nungi sen crore ka dak tema angur, mesüra bendanglen nungi senotsü tenla lakh 10 dak tema angur, item tentet den office ketdangpurtemji tang nungibo public servants ama züngshitsü aser parnok kiojen aser rongsen den parnok kinüngtsü aser chirnur rongsen tan July 31 nü tashi nung sangdongtsüla, ta Centre-i tan hopta metetdakja liasü, saka bill tasenba agizükba ajanga iba mapang atsülangshir.
Personal ministry tongti ketdangser kati, “Sorkari senotsü agi bendanga yariba mesüra tera agi yariba, mesüra küm shia sen tarulen crore ka dak tema society aser tentet nung director, manager, secretary mesüra ketdangser mashie teinyakdakpur aser tamalen inyaka alir ajak iba ozüng kübok aittsü,” ta metetdaktsüogo.
Lokpal and Lokayukta (Amendment) Bill, 2016 ya Bodhbarnü Lok Sabha nung agizüka liasü aser Brihostibarnü Rajya Sabha nunga agizükogo.
Iba bill dak sentakba nung Personnel, Public Grievances & Pensions Minister, Jitendra Singh-i, “Onoki Lokpal bill tashi meitdaktsütsü tebilemba mali. Sorkari Lokpal Act nungiter aser ibaji atangji nung benoktsü,” ta ashi.
Ajisüaka iba bill ashishia CPI-(M) lenir, T.K. Rangarajan-ibo, “CPI-M aser Left-i iba bill pumasemer. Lokpal ozüng tesashiba akumtsüla,” ta ashi.
Paisa, “Ochimashirtemi parnok senji pei kinüngtsü aser chirnurtem tenüng nung rizünger. Parnok kinüngtsü ana-asem lir. Item ochimashirtemji onoki menungiter,” ta ashi.
Ajisüaka tesülen ‘voice vote’ ajanga iba bill agizük.