Parliament nung sorkari UAPA Amendment Bill agizükogo

New Delhi, Luroi/August 02 (Agencies): Hokolbarnü Parliament nung sorkari UAPA Amendment bill agizükogo; iba bill ajanga anti-terror law yanglushia nisung ka ‘kiralongrar’ ta sangdonga pa/la indang kiojen sota ayutsü atema Central sorkar nem tashi agütsütsü.
July 24, 2019 nü Lok Sabha nung Unlawful Activities (Prevention) Amendment Bill, 2019 agizüka liasü aser tanü Rajya Sabha nunga iba bill agizük.
Iba bill ajanga Unlawful Activities (Prevention) Act, 1967 melener. Opposition-ibo iba bill ya select committee ka nem tama reprangshidaktsünüa liasü saka sorkari ibaji magizük.
Rajya Sabha nung züngsem 147-i iba bill pusema vote agütsü aser iba bill anema vote agütsürji züngsem 42 liasü.
Rajya Sabha nungsa opposition-i iba bill select committee ka nem reprangdaktsütsü atema mepishiba anema vote 104 agütsü aser pusema agütsüba vote ji 85 dang liasü.
Iba amendment bill atema o toktepdang Union Home Minister, Amit Shah-i iba amendment atema level pezü nung reprangshi, aser iba bill ajanga meimchir temeden alema meinyaktsü, ta metetdaktsü.
Paisa, nisung ka kiralongrar ta sangdongtsü nüngdak, kechiyong kodang tentet ka nokdangdir parnoki ano tenet aika tenteter, ta ashi.
Nija kati kiralongra nung shilem agira mesüra ajungkettsüra paji kiralongrar ta sangdongtsü akok, ta paisa ashi.
Iba amendment ajanga kiralongra dak sendakba ken otem tekaraba nung kaa ken otem tembangtsü, ta pai ashi.
Kiralongra ya tamangba yimsü mali, kechiyong kiralongrartemi meimchirtem anema inyaker, ta pai metetdaktsü.