Parliament nung Uttarakhand, Arunachal onük nung rongrong adok

New Delhi, April 25 (Agencies): Uttarakhand aser Arunachal Pradesh na nung Tir yimsüsüba benokba onük nung Hombar nü Parliament nung Congress Party-i, nüburtemi shimteta aliba opposition party tem indang sorkartem (state sorkar) nung Modi-i tashi ambangyima amshir, ta aitsü.
Parliament senden tenzüknü iba onük ya Lok Sabha aser Rajya Sabha naprong nung benoka senden nung rongrong adokba den külemi House anaprong nung Congress züngsemtemi sabangleni oa yimyim ayima liasü.
Lok Sabha nung Congress-i iba onük nung o lemteptsü takhangba agütsü, ajisüaka mendenbubai ibaji magizükba ajanga Congress lenir, Mallikarjun Kharge-i anir party züngsemtemi sabanglen mener lungkak aita liasü.
Tanü Lok Sabha senden tenzükba sülen Kharge-i, “Iba ya democracy tepsetba lir,” ta shia Speaker, Sumitra Mahajan dang, iba onük nung o lemteptsü atema takhangba agütsü. Sabanglen Congress den JD(U) aser AAP züngsemtema liasü.
AAP lenir, Bhagwant Mann-ibo Mendenbuba dang aiben, Kharge nem mapang agüjang ta mepishia liasü.
Kharge-i”, Union sorkari MLA tem alizüker, aser Temzüng tepsetba ajanga BJP-i sorkar akümtsü atema MLA tem ajungmesor,” ta aitsü.
Ibaji langzüa Speaker-i Kharge dang,  iba onükji Supreme Court nung benoka lir, anungji iba dak alia nai mejembitsüla, ta ashi.
Kharge-i, iba o ya Uttarakhand high court-i obendang agütsüba indang masü saka Centre sorkari inyakba indang jembir, ta ashi. Paisa, Centre nung BJP sorkari linük Temzüng anogo amunger aser Temzüng yanglusang, BR Ambedkar tasoba anogo amunger, ajisüaka Arunachal Pradesh o  Uttarakhand na nung nüburtemi shimtetba sorkar temzüng alema atsüngtoktsü parnoki meranger, ta aitsü.
“NDA sorkari state ajak nung sorkar tashi agitsü ariteper ama reprangteter. Linük Temzüng lir, ta mamatoktsüla. Assembly nung züngsem tashi sayutsü atema nenoki  March 28 tashi atatsüla ser nung nenoki March 27 nü Tir yimsüsüba benok,” ta pai ashi.
Iba dak sentakba nung Union Home minister Rajnath Singh-i, “Uttarakhand aser Arunachal Pradesh na yimtenren nung mepetmesü adokbaji NDA mesüra BJP ajanga masü. “Iba ya parnok party telung nung mangatettep ajanga lir,” ta ashi.