Parliament senden jelia Modi aser Rahul na aitsütepdagi

Jammu/Jaipur, July 18 (Agencies): Taruba hopta Parliament senden tenzüktsü lia Ato kilonser Narendra Modi aser Congress tatong Tir Rahul Gandhi na aitsütep tenzükogo, koba ajanga taruba senden junga mekatettsü südi ta temaitsü sayur.
Asür Jammu & Kashmir finance minister Girdhari Lal Dogra asoba anogomong nung pa tenüng sanga tanü Jammu nung Ato kilosner Modi-i, Dogra-i budget 26 benoka liasü saka pai par kinünger züngsemtem aser par jala kinüngbu (Union Minister Jaitley) atemabo kecha meinyaktsü, ta ashi.
Modi-isa, Dogra-i nüburtem melungsentsü junga meteta liasü aser pai Congress densema party balala nung lenir aika junga anitetogo, ta ashi.
Ato kilonseri ashiba agi, ‘tanü pei chir kinüngbu’ den tesentaktep ama masü saka Jaitley-i pa kinüngtsü tebu melung mepelatsüsa kecha meinyak. Iba o ya Congress Tir Sonia Gandhi aser lar jala kinüngbu Robert Vadra dak sentakba nung aija jembiba oren ka lir, kechiyong shishilembabaren dak sentakba nung Vadra-i Congress Tir tejak metettettsüsa inyaka lir.
Ano külen yashi Jaipur nung Congress lenir Rahul-i Modi aitsüba olen ka nung “inch 56 tasazük teku ji inch 5.6 tashi ajema kümtsütsü” ta shia liasü.
Rahul-i, Modi’er sorkari Parliament nung aluyimer anemba bill tem benokbaji Congress-i nokdangtsü ta shiogo.
“Itemji magizükdaktsütsü; aluyimertem meyong ali inch kata magütsütsü,” ta Rahul-i Jaipur nung aliba Birla Auditorium nung regional Congress züngsemtem senden nung jembidang ashi.
Modi-i yimsüsüba yimya aija Gandhi-i, “BJP aser RSS nati Modi-i jembiba ajakji inyakdaktsüner, Advani-i ola madoki ibaji angatsüla aser minister temi ola madoki angatsüla. Iba sorkar nung minister 60-65 mali; ka dang lir, aser ibaji Ato kilonser. Item nisung 60-65 yabo noksa dang,” ta ashi.