Parliament senden Nov. 26 nungi Dec 23 tashi akatsü

New Delhi, Nov. 09 (Agencies): Home Minister, Rajnath Singh leniba nung Cabinet Committee on Parliamentary Affairs (CCPA) senden amendang taruba Parliament asükwa senden Nov. 26 nü nungi Dec. 23 nü tashi agitsü lemtetogo.
Taoba tzüngluruwa Parliament senden nung GST Bill aser Land bill densema tongtibang bill aika magizükteti liasü aser maneni taruba senden nunga sorkari kasa bill tem benoktsü tebilemba lir.
Parliamentary Affairs Minister, M Venkaiah Naidu-i, “Opposition-i Parliament senden junga kadaktsüra sorkari ‘akhümtsübutep maliba’ onük lemteptsü mulunga lir. Opposition party-i Parliament junga makatetdaktsütsü (stall Parliament) aser bill benoktsü tasak kümdaktsütsü ta media osang aliba ajanga ni kanga tebilemtsü akar. Temelenshi nüngdaker aser ibaji party temi angatettsü ta ni amanger. Onük ajunga nung opposition o angadangtsü sorkari teti mulunga lir,” ta ashi.
Bihar election nung BJP-i tamakok anguba mapang ka nung iba senden tenzüktsü, aser iba senden nung opposition party temi, tawa hopta ishika kaket ken o zülurtem aser film yanglurtemi award meyipa agütsüba aser Dadri nung Muslim nunger ka tepsetba onüktem nung sorkar anema noktaktsü südi.