Parliament thinendaktsüba ya democracy atema majung: Jayant

New Delhi, December 10 (Agencies): Tanü Centre sorkari, National Herald ken o nung Congress-i tanen makai Parliament senden junga magitetdaktsüi thinendaktsüba ya democracy atema majung, ta ashiba den külemi nija kar dak sentakba onüktem ajanga maparen ajak tamakok ngudaktsür, ta aitsüogo.

National Herald ken o nung tanü agi asemnübuba Congress-i Rajya Sabha senden junga magitetdaktsüba dak sentakba nung Minister of State for Finance Jayant Sinha-i “Asen Linük Temzüng nung lateta aliba democratic inyakyim junga mebenoktetter ta asüba ya kanga tia maka,” ta ashi.

Sangküm April mezüngnü nungi tenzüktsü aliba kanga tongtibang Bill, Goods and Services Tax (GST) Bill ya Rajya Sabha nung ano magizüki lir.

“Item onük ya nija kar aser party kar dak sentaktepa lir, koba ajanga maparen ajak nung tamakok ngudaktsür. Nüburtem indang onük maneni nokdangra, ni bilemer iba ya asen democracy atema tejashitsü anogo ka asütsü. Anungji Parliament junga katettsüji asenoki nüngdaker,” ta pai ashi.

State aser Centre napronglai saru aika saruba inyakyim ya sorkari GST Bill agi melentsü tebilemba lir.

“Mapa küma inyaktsü atema nüburtemi atadar. India nüburtemi taküm jenjang tajungba kümner, aser item nüngdakji ataloktsüdi süra democratic inyakyim junga aotsüla, Parliament junga katettsüla,” ta Sinha-i ashi.

Sangküm April 1 nungi GST mapa akumtsü asü (?) ta asüngdangba langzüdang pai, “Linük ka ama India nüburtem atema asenok ajak longjemer inyakra, asenoki ibaji atalokdaktsütettsü,” ta ashi.

Congress Tir Sonia Gandhi aser lar jabaso Rahul Gandhi na atema osang tamajung kaji, Hombar nü Delhi High Court-i tenati mepishiba ka magizük, anungji National Herald ken o nung tena trial court matsüngdang nokdaktsüsa akumtsü.